• 7
  • Fev

Shayxali koloniyasi kutubxonasiga kitoblar taqdim etildi

Inson huquqlari bo'yicha O'zbekiston Respublikasi Milliy markazi tomonidan Qashqadaryo viloyati, Qarshi shahar Shayxali qo'rg'onida joylashgan 2-son jazoni ijro etish koloniyasi kutubxonasiga beg'araz asosda turli huquqiy, adabiy va ma'rifiy kitoblar topshirildi. Bunday sovg'a uchun muassasa ma'muriyati va mahkumlar o'z minnatdorliklarini bildirishdi.

5-6 fevral kunlari Inson huquqlari bo'yicha O'zbekiston Respublikasi Milliy markazi bo'lim boshliqlari Otabek Norboev va Farhod Hayitboev mazkur muassasada jazo muddatini o'tayotgan bir guruh mahkumlar bilan suhbatlashdi. Uchrashuvda ularni qiziqtirgan savollarga javoblar hamda qonunchilik talablari bo'yicha tushuntirish va maslahatlar berildi. Muloqot chog'ida mahkumlar qo'shimcha detektiv kitoblar, lug'atlar, adabiy-ma'rifiy kitoblardan yuborishni so'rashdi.

– Mamlakatimiz jinoyat-ijroiya qonun hujjatlarining vazifasi jazo ijrosini ta'minlash, mahkumlarni axloqan tuzatish, jinoyatlar sodir etilishi oldini olish, mahkumlarning huquqlari, erkinliklari va qonuniy manfaatlarini himoya qilishdan iborat, – deydi Markazning Jismoniy va yuridik shaxslar murojaatlari bilan ishlash bo'limi boshlig'i O.Norboev. – Shu bois muassasada mahkumlarning yashash sharoitlari, ovqatlanish, dam olish hamda ijtimoiy foydali mehnat bilan mashg'ul bo'lishlari ahvoli, shuningdek bo'sh vaqtlarida sport bilan shug'ullanish, kitob o'qish, tibbiy xizmatdan foydalanishlari uchun yaratilgan shart-sharoit bilan tanishdik.

Markazning Inson huquqlari sohasidagi ta'lim va ma'rifat bo'limi boshlig'i F.Hayitboev qayd etganidek, jazo muddatini o'tayotgan ayrim mahkumlarning sog'lig'i O'zbekiston Respublikasi Sog'liqni saqlash vazirligidan jalb qilingan malakali mutaxassislar kuzatuvidan o'tkazildi va ular o'zlarining xulosalarini berishdi. O'rganish yakunida muassasa ma'muriyatiga tegishli taklif va mulohazalar bildirildi.

Muassasa rahbariyati kelgusida mahkumlar bilan uchrashuvlar o'tkazish uchun joylardan ko'pni ko'rgan nuroniylar, iqtidorli yoshlar, Xotin-qizlar qo'mitasi va “Mahalla” xayriya jamoat fondi mas'ullari ham tez-tez kelib turishlari maqsadga muvofiq ekaniga e'tibor qaratdi. Bunday xalqchil muloqotlar, o'z navbatida, mahkumlarning to'g'ri yo'lni tanlashida foydalidir.

 

Inson huquqlari bo'yicha
O'zbekiston Respublikasi
Milliy markazining
matbuot xizmati