2022 yil 3 dekabr kuni “Inson huquqlari sohasida ta’lim” Global forumining yana bir xorijiy ishtirokchisi – professor Aleksandr Sungurov Samarqand shahriga yetib keldi. Mehmonni Inson huquqlari bo‘yicha O‘zbekiston Respublikasi Milliy marka...
2022 yil 3 dekabr kuni “Inson huquqlari sohasida ta’lim” Global forumining yana bir xorijiy ishtirokchisi – professor Aleksandr Sungurov Samarqand shahriga yetib keldi. Mehmonni Inson huquqlari bo‘yicha O‘zbekiston Respublikasi Milliy markazining Samarqand xalqaro aeroportidagi shtabi mas’ullari kutib oldilar. Aleksandr Sungurov – Yevropa ombudsman instituti boshqaruvi a’zosi, Rossiya Federatsiyasining Sankt-Peterburgdagi “Oliy iqtisodiyot maktabi” Milliy tadqiqot universiteti kafedra mudiri, Sankt-Peterburg Gumanitar va siyosiy strategiyalar markazi prezidentidir. Shuningdek, u Yevropa Kengashining inson huquqlari bo‘yicha eksperti hisoblanadi. A.Sungurov Rossiya mintaqalarida Ombudsman institutini ta’sis etish jarayonlarini hamda korrupsiyaga barham berish bo‘yicha fuqarolik tashabbusini faol qo‘llab-quvvatlagan. Taniqli olim Rossiyada demokratiyaning yangi institutlari va fuqarolik jamiyatini rivojlantirish mavzusida to‘rtta kitob hamda ko‘plab maqolalar chop ettirgan. Professor A.Sungurov Samarqand Global forumining birinchi kuni 4-parallel sessiyada “Fuqarolik jamiyati uchun inson huquqlari sohasidagi ta’lim” mavzusida ma’ruza qiladi. Inson huquqlari bo‘yichaO‘zbekiston RespublikasiMilliy markaziningmatbuot xizmati