• 15
  • Fev

Inson huquq va erkinliklari masalalari yuzasidan fundamental va amaliy ilmiy tadqiqotlarni faollashtirishda Ilmiy-muvofiqlashtiruvchi kengash rolini kuchaytirish

2019 yilning 15 fevral` kuni Inson huquqlari bo'yicha O'zbekiston Respublikasi milliy markazida tashkilot qoshidagi Ilmiy-muvofiqlashtiruvchi kengashning “Inson huquq va erkinliklari masalalari yuzasidan fundamental va amaliy ilmiy tadqiqotlarni faollashtirishda Ilmiy-muvofiqlashtiruvchi kengash rolini kuchaytirish” mavzusidagi yig'ilishi bo'lib o'tdi.

Tadbir Inson huquqlari bo'yicha O'zbekiston Respublikasi milliy markazi hamda Rossiya tashqi ishlar vazirligi Moskva davlat xalqaro aloqalar instituti (universiteti) tomonidan tashkil etildi.

Majlisdan ko'zlangan maqsad – inson huquq va erkinliklari sohasidagi ilmiy tadqiqotlar samaradorligining asosiy yo'nalishlarini muhokama qilish, shuningdek, Ilmiy-muvofiqlashtiruvchi kengash Nizomining yangi tahriri va 2019 yilgi ish rejasini tasdiqlashdan iborat.

Tadbirda Rossiya xalqaro huquq assotsiatsiyasi vitse-prezidenti, yu.f.d., professor Entin Mark L`vovich “Inson huquqlari himoyasining Yevropa tizimi yutuq va kamchiliklari” mavzusidagi ma'ruzasi bilan, Inson huquqlari bo'yicha O'zbekiston Respublikasi milliy markazi direktori, O'zbekiston Respublikasi Fanlar akademiyasi akademigi Akmal Saidov, Oliy Majlis Qonunchilik palatasi deputatlari, ijro va sud hokimiyati organlari, ilmiy doiralar, fuqarolik jamiyati institutlari, ta'lim muassasalari, shuningdek ommaviy axborot vositalari vakillari ishtirok etdilar.

IMK majlisida e'tirof etilishicha, inson ehtiyojlari, jamiyat va davlat manfaatlarini huquq tiliga ko'chirishga xizmat qiluvchi huquqiy fan mamlakatning siyosiy, iqtisodiy, madaniy va ma'naviy taraqqiyotiga oid muammolarga yechim topish maqsadida, amaliyot bilan hamnafaslik, o'tish davrida paydo bo'ladigan real ziddiyatlarni aniqlash va o'rganish darajasini oshirish ko'nikmalariga ega bo'ldi.

Huquqiy fanning sud-huquq islohotlarini o'tkazish, davlatning jinoiy ishlar borasidagi siyosatini liberallashtirish va insonparvarlashtirish, insonning yashash va shaxsiy daxlsizlikka bo'lgan huquqlarini himoyalashning nazariy-amaliy asoslarini ishlab chiqish, qiynoq va boshqa shafqatsiz muomala turlaridan himoya, huquqiy himoyaga bo'lgan huquqlarni kuchaytirish, o'lim jazosining bekor qilinishi va “Xabeas korpus” institutining, odam savdosi hamda bolalar majburiy mehnatiga qarshi kurashning huquqiy kontseptsiyasi joriy etilishidagi ahamiyati beqiyos.

O'zbekiston Respublikasining inson huquqlari borasidagi 70 xalqaro-huquqiy hujjatga qo'shilgani, xalqaro standartlarning milliy qonunchilikka, huquqni qo'llash amaliyoti va jamoatchilik ongiga implementatsiyasi mexanizmlarini yaratish zarurati O'zbekistonda inson huquq va erkinliklari mavzusiga oid huquqiy tadqiqotlarni kengaytirish va rivojlantirish uchun qo'shimcha turtki bo'ldi.

Yuridik fanlar sohasida inson huquqlari masalalari borasidagi ilmiy tadqiqotlarning kerakli darajada muvofiqlashtirilishini, inson huquqlarini himoyalash kafolatlarini kuchaytirishga yo'naltirilgan islohotlarning huquqiy ta'minoti masalalari yuzasidan nazariyotchi-huquqshunoslar va amaliyotchilar o'rtasidagi hamkorlik muhitini ta'minlash maqsadida, Inson huquqlari bo'yicha milliy markaz tomonidan 2010 yilda inson huquqlari sohasidagi ilmiy tadqiqotlar bo'yicha Ilmiy-muvofiqlashtiruvchi kengash tashkil etilgan bo'lib, ushbu Kengash inson huquqlariga oid ilmiy tadqiqotlarni faollashtirishga qaratilgan
qator tadbirlar o'tkazib kelmoqda.

IMK yig'ilishida ilmiy va ta'lim muassasalarining inson huquqlari bo'yicha milliy institutlar hamda inson huquqlari himoyasi davlat tizimi amaliyotchi xodimlari bilan hamkorlik darajasini oshirish, mazkur faoliyatning inson huquqlariga bag'ishlangan dissertatsion tadqiqotlarni tayyorlash, muhokama va himoya qilishdagi koordinatsiyasini kuchaytirish lozimligi qayd etildi.

2017-2021 yillarda O'zbekiston Respublikasini rivojlantirishning besh ustuvor yo'nalishi bo'yicha Harakatlar strategiyasi hamda O'zbekiston Respublikasi Prezidentining mamlakat Oliy Majlisiga yo'llagan Murojaatnomasida qo'yilgan vazifalar qonun chiqaruvchi, ijro va sud hokimiyatlari organlari faoliyatida inson huquqlari ta'minlanishining nazariy va amaliy aspektlarini ishlab chiqishga yo'naltirilgan yuqori sifatli va dolzarb ilmiy tadqiqotlarga ehtiyoj mavjudligidan dalolat beradi.

O'zbekiston Respublikasi Prezidentining mamlakat Oliy Majlisiga yo'llagan Murojaatnomasida zamon talabiga javob beruvchi fan va uzluksiz ta'lim tizimini takomillashtirishni davom etish lozimligi alohida ta'kidlangan. Bunda eng muhim masala – ilmiy salohiyatni oshirish, ilmiy va ilmiy-pedagogik kadrlar tayyorlashni kengaytirish, shuningdek, davlat boshqaruvi organlarida strategik tahlil va prognozlashga oid tuzilmalarni shakllantirishdan iborat.

Yig'ilish ishtirokchilari tomonidan mamlakatda inson huquqlarini himoyalashning milliy tizimini takomillashtirish, aholining huquqiy madaniyati va siyosiy faolligini oshirishga yo'naltirilgan izchil choralar alohida e'tirof etildi. So'nggi yillarda aholi hayotining eng muhim tomonlarini liberallashtirish, fuqarolarning huquq va erkinliklarini kafolatlovchi qonunchilik asosini mustahkamlash bo'yicha aniq choralar amalga oshirildi.

Yig'ilishda insonning asosiy huquq va erkinliklarini amalga oshirish va ilmiy tadqiq etish, o'rganishda inson huquqlari masalalariga oid fundamental va amaliy ilmiy tadqiqotlarning roli va o'rni tahlil etildi.

 
 
 

Inson huquq va erkinliklari masalalari yuzasidan fundamental va amaliy ilmiy tadqiqotlarni faollashtirishda Ilmiy-muvofiqlashtiruvchi kengash rolini kuchaytirish