• 7
  • Sen

Inson huquqlari bo'yicha Samarqand veb-forumi rezolyutsiyasi - BMT Bosh Assambleyasi 74-sessiyasining rasmiy hujjati

O'zbekiston Respublikasining BMT huzuridagi doimiy vakolatxonasi ma'lumotiga ko'ra, joriy yil 12-13 avgust kunlari o'tkazilgan «Yoshlar-2020: global hamjihatlik, barqaror rivojlanish va inson huquqlari» mavzusidagi inson huquqlari bo'yicha Samarqand onlayn forumi yakunlari bo'yicha qabul qilingan rezolyutsiya BMT Bosh Assambleyasi 74-sessiyasining rasmiy hujjati sifatida taqdim qilindi, deb xabar berdi N`yu-York shahridan  «Dunyo» AA muxbiri.

Hujjat BMT Bosh Assambleyasi 74-sessiyasi kun tartibining «Inson huquqlarini rag'batlantirish va himoya qilish» bandi doirasida tarqatildi. Ma'lumot Birlashgan Millatlar Tashkilotining 6 ta rasmiy tili - arab, ingliz, ispan, xitoy, rus va frantsuz tillariga tarjima qilindi va barcha a'zo davlatlarga tarqatildi.

Inson huquqlari bo'yicha Samarqand veb-forumi rezolyutsiyasi, shuningdek, BMTning Rasmiy hujjatlar tizimida A/74/998 raqami ostida joylashtirildi.

Ma'lumot uchun: Inson huquqlari bo'yicha Samarqand onlayn forumida dunyoning 700 nuqtasidan 1000 dan ortiq ishtirokchi qatnashdi.

O'zbekiston Respublikasi Prezidenti Shavkat Mirziyoev forum ishtirokchilariga yo'llagan tabrigida «kelajakka intilib yashaydigan yosh avlod sayyoramizda farovon hayot va yuksak taraqqiyot barqaror bo'lishi uchun yangi g'oyalar va ijodiy ruhdagi sa'y-harakatlarni amalga oshiradigan beqiyos kuchdir», deb ta'kidlagan.

Forum ochilishida BMT Bosh kotibi Antoniu Guterrish tomonidan ishtirokchilarga videomurojaat yo'llandi. Unda BMT rahbari O'zbekiston rahbariyatiga inson huquqlari bo'yicha Samarqand forumini tashkil qilgani uchun minnatdorlik bildirgan.

Ochilish marosimida 15 dan ortiq xalqaro va mintaqaviy tashkilot rahbarlari, 10 ta asosiy ma'ruzachi so'zga chiqdi, shuningdek, 32 ta qo'shimcha chiqishlar, jumladan 9 nafar yoshlar vakili tomonidan ma'ruzalar taqdim etildi.

Ushbu muhim xalqaro tadbir turli mamlakatlar yoshlari vakillariga davlat amaldorlari bilan fikr almashish, yoshlar tashabbuslarini amalga oshirish, yoshlar huquqlarini himoya qilishning umume'tirof etilgan mexanizmlarini muhokama qilish imkoniyatini berdi.

Forum yakunlari bo'yicha «Yoshlar-2020: global birdamlik, barqaror rivojlanish va inson huquqlari» deb nomlangan Samarqand rezolyutsiyasi qabul qilindi.

Hujjat bilan https://www.undocs.org/ru/A/74/998 havolasi orqali tanishish mumkin.

Inson huquqlari bo'yicha
O'zbekiston Respublikasi
Milliy markazining
matbuot xizmati