2021 yil 9 iyun kuni Oliy Majlis Qonunchilik palatasi Xalqaro ishlar va parlamentlararo aloqalar qo'mitasi Inson huquqlari bo'yicha O'zbekiston Respublikasi Milliy markazining “Inson huquqlari bo'yicha O'zbekiston Respublikasining Milliy strategiyasini amalga oshirish bo'yicha “Yo'l xaritasi”ning ijrosi yuzasidan axborotini eshitdi.

Tadbirni Oliy Majlis Qonunchilik palatasi Spikerining birinchi o'rinbosari A.Saidov ochar ekan, “Inson huquqlari bo'yicha O'zbekiston Respublikasining Milliy strategiyasi” O'zbekiston Respublikasi Prezidentining 2020 yil 22 iyundagi Farmoniga muvofiq tasdiqlangani, unda inson huquqlari sohasida erishilgan yutuqlar, strategiyaning maqsad va vazifalari, uni amalga oshirishning asosiy yo'nalishlarini monitoring qilish, moliyalashtirish mexanizmi va kutilayotgan natijalar o'z aksini topganligini qayd etib, mazkur strategiyani amalga oshirish bo'yicha “yo'l xaritasi”da xalqaro standartlarni qonunchilikka implementatsiya qilish, aholining huquqiy savodxonligini oshirishda xalqaro va mintaqaviy tuzilmalar bilan o'zaro hamkorlikni yanada rivojlantirishga alohida e'tibor berilganligini ta'kidladi.

Eshituvda dastlab, Inson huquqlari bo'yicha O'zbekiston Respublikasi Milliy markazi direktorining birinchi o'rinbosari M. Tillaboevning Inson huquqlari bo'yicha O'zbekiston Respublikasining Milliy strategiyasini amalga oshirish bo'yicha “yo'l xaritasi”ning ijrosi yuzasidan hisoboti eshitildi.

Qayd etilganidek, “yo'l xaritasi”da belgilangan vazifalarning amalga oshirilishi yuzasidan 2021 yil 1 iyun holatidagi monitoring natijalari ma'lum qilindi. Unga ko'ra, 28 band bo'yicha ishlar o'z muddatida to'liq bajarilgani, 50 band ijrosi davom etayotganligi ta'kidlandi.

Shuningdek, Milliy strategiya ijrosi doirasida 33 ta qonun loyihasini ishlab chiqish nazarda tutilgan. O'tgan davr mobaynida “O'zbekiston Respublikasining Konstitutsiyaviy sudi to'g'risida”gi, “Ta'lim to'g'risida”gi, “Odam savdosiga qarshi kurashish to'g'risida”gi yangi tahrirdagi qonunlari hamda “Aholi bandligi to'g'risida”gi va “Nogironligi bo'lgan shaxslarning huquqlari to'g'risida”gi qonunlari qabul qilingani alohida e'tirof etildi.

Shu bilan bir qatorda “Yo'l xaritasi”ning ijrosi doirasida BMTning Inson huquqlari va Qochoqlar masalalari bo'yicha Oliy komissarlari boshqarmalari, BMTning Taraqqiyot dasturi, YEXHTning O'zbekistondagi loyihalari koordinatori bilan hamkorlikda sud va huquqni muhofaza qiluvchi organlarining 500 nafardan ortiq rahbar-xodimlari inson huquqlari sohasidagi malakasini onlayn-trening asosida oshirilgan.

“Yo'l xaritasi”ga muvofiq, Oliy Majlis Qonunchilik palatasi Kengashi va Senati Kengashining 2020 yil 25 sentyabrdagi “O'zbekiston Respublikasining inson huquqlari sohasida xalqaro majburiyatlarga rioya etilishi bo'yicha Parlament komissiyasini tuzish to'g'risida”gi Qo'shma qarori asosida tuzilib, mazkur komissiya o'z faoliyatini olib bormoqda.

O'zbekiston Respublikasi ratifikatsiya qilgan va qo'shilgan inson huquqlari sohasidagi xalqaro shartnomalar mazmuni to'g'risida aholi hamda davlat hokimiyati va boshqaruvi organlari vakillarining xabardorligini oshirish bo'yicha axborot-ta'lim tizimini takomillashtirish chora-tadbirlari ishlab chiqilib, ijroga qaratildi. Mazkur chora-tadbirlar doirasida O'zbekiston Respublikasi ratifikatsiya qilgan va qo'shilgan Inson huquqlari sohasidagi 81 ta xalqaro shartnomadan 51 tasi davlat tiliga tarjima qilingan.

Ta'kidlanganidek, “yo'l xaritasi” ijrosi doirasida Nogironlar huquqlari to'g'risidagi xalqaro konventsiya (Nyu York, 2000 yil, 13 dekabr) ratifikatsiya qilindi. Konventsiyaning qabul qilinishi nogironlarni ijtimoiy himoya qilish milliy tizimini ilg'or xalqaro standartlarga muvofiqlashtirish, nogironlarning ijtimoiy himoyasini kuchaytirish borasida umume'tirof etilgan normalarning keng tatbiq etilishiga xizmat qiladi.

Eshituv davomida Tashqi ishlar vazirligining “O'zbekiston Respublikasi tomonidan Inson huquqlari sohasida ratifikatsiya qilingan xalqaro hujjatlar bo'yicha vazirlik tomonidan olib borilayotgan amaliy ishlar to'g'risida”gi, Adliya vazirligining “Inson huquqlari masalalari bo'yicha xalqaro hujjatlarga amal qilinishi bo'yicha aholi, davlat hokimiyati va boshqaruv organlarining xabardorligini oshirish borasidagi chora-tadbirlar haqida”gi hisobotlari eshitildi.

Tadbirda berilgan savollar, bildirilgan fikr va mulohazalar asosida ishlab chiqilgan taklif va tavsiyalarni o'zida mujassam qilgan qo'mitaning tegishli qarori qabul qilindi.

Manba: parliament.gov.uz