Parlamentlararo Ittifoq Bosh kotibi Martin Chungong 2021 yil 22 iyun kuni Toshkentga shahriga tashrif buyurdi.

Bu mazkur nufuzli xalqaro tashkilot rahbarining O'zbekistonga ilk tashrifi hisoblanadi.

Bugun Parlamentlararo Ittifoq Bosh kotibi O'zbekiston Respublikasi Oliy Majlisi Senati Raisi va Qonunchilik palatasi Spikeri bilan uchrashdi. Mo''tabar mehmon Oliy Majlis Qonunchilik palatasida bo'lib o'tadigan “Parlamentda yoshlarni qo'llaymiz” mavzusidagi yoshlar parlament forumida ishtirok etadi.

23-24 iyun kunlari Martin Chungong Buxoro shahrida bo'lib o'tadigan "Barqaror rivojlanish maqsadlariga erishishda parlamentlararo global hamkorlik" xalqaro forumida ishtirok etishi rejalashtirilgan.

25 iyunda Parlamentlararo Ittifoq Bosh kotibining Samarqand shahrida keng jamoatchilik va din arboblari ishtirokida tashkil etiladigan “Millatlararo totuvlik va dinlararo bag'rikenglikni ta'minlashda parlamentning roli” mavzusidagi parlament forumida ishtirok etishi kutilmoqda.

Ma'lumot uchun: Martin Chungong – 130 yildan ko'proq tarixga ega nufuzli xalqaro tashkilot hisoblanuvchi Parlamentlararo Ittifoqning sakkizinchi Bosh kotibidir. U ushbu Tashkilot tarixida bunday yuqori lavozimga ko'tarilgan dastlabki yevropalik bo'lmagan mutaxassis hisoblanadi.

Martin Chungong kamerunlik xalqaro siyosatchi bo'lib, parlamentlar tizimi bo'yicha 40 yillik milliy va xalqaro ish tajribasiga ega. U ma'lumotiga ko'ra – tilshunos. Yaunde (Kamerun) va Ottava (Kanada) universitetlarining professori. Ingliz, frantsuz va ispan tillarida erkin so'zlashadi.

Martin Chungong O'zbekistonda amalga oshirilayotgan islohotlar, shu jumladan, parlamentarizmni rivojlantirish, yoshlarni qo'llab-quvvatlash, gender tenglikni ta'minlash, fuqaroligi bo'lmagan shaxslar holatini yaxshilash borasidagi o'zgarishlarni ijobiy baholaydi. U O'zbekiston Respublikasi Prezidenti  Shavkat Mirziyoev ilgari surgan BMT Bosh Assambleyasining “Barqaror rivojlanish maqsadlariga erishish va inson huquqlarini ta'minlash borasida parlamentlarning rolini oshirish to'g'risida”gi rezolyutsiyasini qabul qilishga doir tashabbusini xalqaro tashkilotlar rahbarlari orasida birinchilardan bo'lib qo'llab-quvvatlagan.

Parlamentlararo Ittifoq Bosh kotibi Martin Chungong 2020 yil avgustida o'tkazilgan Inson huquqlari bo'yicha Samarqand forumida virtual rejimda ishtirok etgan.

Inson huquqlari bo'yicha
O'zbekiston Respublikasi
Milliy markazining
matbuot xizmati