2021 yil 22 iyun kuni Oliy Majlis Qonunchilik palatasida “Men parlamentda yoshlarni qo'llayman” (I SAY YES TO YOUTH IN PARLIAMENT) mavzusida yoshlar parlamentlari forumi tashkil etildi.

Ushbu forumda Parlamentlararo Ittifoqning Bosh kotibi Martin Chungong, Oliy Majlis Qonunchilik palatasi Spikerining birinchi o'rinbosari, akademik Akmal Saidov, Qonunchilik palatasi Yoshlar masalalari bo'yicha komissiyasi hamda Yoshlar parlamentlari a'zolari ishtirok etdilar.

Ta'kidlanganidek, Parlamentlararo ittifoq — turli davlatlarning milliy parlament guruhlarini birlashtiruvchi xalqaro (hukumatlar qaramog'ida bo'lmagan) tashkilotlardan biri. 1889 yil tuzilgan. Asosiy vazifalari: parlamentlar o'rtasidagi shaxsiy aloqalarni rag'batlantirish va xalqaro tinchlik hamda hamkorlikni mustahkamlash ishida birgalikda faoliyat ko'rsatish uchun ularni birlashtirish. Parlamentlararo ittifoq faoliyatida 170 dan ortiq davlatning parlament guruhlari qatnashadi. Parlamentlararo ittifoq kotibiyatining qarorgohi — Jeneva shahrida joylashgan.

Uchrashuvdan ko'zlangan maqsad yoshlarning huquqlari va manfaatlarini himoya qilish sohasida, jumladan O'zbekistonda yoshlarga oid davlat siyosatini amalga oshirishda erishilgan natijalarni, yoshlarning davlat boshqaruvi va parlamentdagi ishtiroki masalalarini keng muhokama qilish.

Oliy Majlis Qonunchilik palatasi Spikerining birinchi o'rinbosari, Parlamentlararo ittifoq ijroiya qo'mitasining raisi o'rinbosari Akmal Saidov O'zbekiston Respublikasi Prezidenti Shavkat Mirziyoevning BMT Bosh Assambleyasining 72-sessiyasida so'zlagan nutqidan o'rin olgan “Sayyoramizning ertangi kuni, farovonligi farzandlarimiz qanday inson bo'lib kamolga yetishi bilan bog'liq. Bizning asosiy vazifamiz – yoshlarning o'z salohiyatini namoyon qilishi uchun zarur sharoitlar yaratishdan iborat” - degan fikrlari yer yuzidagi har bir mamlakat uchun birdek ahamiyatli ekanligini ta'kidlab, O'zbekistonda so'nggi yillarda yoshlarga qaratilayotgan mazmundor islohotlar haqida so'z ochib, yoshlar huquqlarini ta'minlashda O'zbekistonning xalqaro minbarlardan bildirayotgan tashabbuslari alohida e'tibor bilan qabul qilinayotganini ta'kidladi.

Parlamentlararo ittifoqning Bosh Kotibi Martin Chungong janoblari ham yoshlarning huquqlarini himoya qilishda shu kabi siyosiy va madaniy-gumanitar tashabbuslarni rivojlantirish va chuqurlashtirish zarurligini alohida e'tirof etdi.

Forumda Oliy Majlis Qonunchilik palatasining Yoshlar masalalari bo'yicha komissiyasi raisi, Parlamentlararo ittifoqning Yosh parlamentariylar Forumi a'zosi Abdullo Aslanov o'z ma'ruzasida yoshlarning bugun rivojlangan va rivojlanayotgan mamlakatlardagi qonun ijodkorligi jarayonida ishtiroki muhim ekanligini, bu borada O'zbekistonda amalga oshirilayotgan islohotlar borasida ishtirokchilarni yaqindan tanishtirdi.

Shuningdek, forumda O'zbekiston Respublikasi Oliy Majlisi Senati va Qonunchilik palatasi huzuridagi Yoshlar parlamentlari a'zolari ham so'zga chiqib, yoshlarga oid davlat siyosatini amalga oshirishda, ularga taalluqli qarorlarni qabul qilishda yoshlar parlamentining o'rnini alohida to'xtalishdi.

Yoshlar parlamenti a'zolarining qonunchilik jarayoni, parlament faoliyati, yoshlar bilan ishlashda to'plangan mahalliy tajriba va loyihalari forumda keng muhokama qilindi.

Muhokamalar davomida Yoshlar parlamentlari a'zolari o'zlarini qiziqtirgan savollarga batafsil javob oldilar, o'z fikr-mulohazalari, takliflari bilan faol ishtirok etdilar.

Tadbir yakunida qo'yilgan maqsad va vazifalarga erishish bo'yicha kelgusi rejalar yuzasidan maslahatlashuvlar o'tkazildi hamda kelishuv asosida shu kabi formatda muhokamalarni doimiy ravishda o'tkazishga kelishib olindi.

Manba: parliament.gov.uz