Qadrli vatandoshlar!

Bugungi kunda mamlakatimizda inson qadri, uning huquq va manfaatlarini taʼminlash davlat siyosatining ustuvor yoʻnalishi etib belgilangan. Bu jarayonda barcha fuqarolarimiz kabi nogironligi boʻlgan yurtdoshlarimizga eʼtibor va amaliy gʻamxoʻrlik koʻrsatish, ularni har tomonlama qoʻllab-quvvatlashga alohida ahamiyat qaratilmoqda.

Bu borada chuqur insonparvarlik gʻoyalari bilan yoʻgʻrilgan saʼy-harakatlarimiz 3-dekabr – Xalqaro nogironlar kunidan koʻzlangan maqsad va vazifalarga uygʻun va hamohang ekanini taʼkidlash lozim.

Dunyo mamlakatlari qatori yurtimizda ham keng nishonlanayotgan mazkur sana munosabati bilan mamlakatimizdagi 1 millionga yaqin nogironligi boʻlgan yurtdoshlarimizga oʻzimning samimiy hurmat-ehtiromim va ezgu tilaklarimni izhor etaman.

Maʼlumki, Oʻzbekistonda nogironligi boʻlgan shaxslarga jamiyat va davlat tomonidan koʻmak va yordam berish, ularni ijtimoiy-siyosiy hayotga faol jalb etishga qaratilgan keng koʻlamli chora-tadbirlar amalga oshirilmoqda. Hozirgi vaqtda ushbu toifaga mansub fuqarolarni qoʻllab-quvvatlashga ixtisoslashgan bir qator tuzilmalar, xususan, Oʻzbekiston nogironlar jamiyati, Nogironlar assotsiatsiyasi, Koʻzi ojizlar jamiyati, Karlar jamiyati samarali faoliyat koʻrsatmoqda.

Eng muhimi, taqdir taqozosi bilan nogiron boʻlib qolgan bironta ham yurtdoshimiz xalqimizning, davlat idoralarining mehru eʼtiboridan chetda qolmasdan, oʻzining mehnati va qobiliyati bilan nafaqat hayotda oʻz oʻrnini egallab kelmoqda, balki azmu matonati, sabr-bardoshi va shukronalik fazilatlari bilan koʻpchilikka ibrat boʻlmoqda.

Biz sizlarning bunday olijanob intilishlaringizni yuksak qadrlaymiz va ijtimoiy-iqtisodiy hayotimizdagi faol ishtirokingiz uchun barchangizga chuqur minnatdorlik bildiramiz.

Aziz doʻstlar!

Jamiyatimizning ajralmas bir qismi boʻlgan nogironligi bor fuqarolarning huquq va manfaatlarini taʼminlash, mehnat va turmush sharoitlarini yaxshilash maqsadida keyingi yillarda mamlakatimizda bir qator qonunlar hamda 25 dan ortiq boshqa meʼyoriy-huquqiy hujjatlar qabul qilinib, mustahkam qonuniy baza yaratildi. Bu esa mazkur toifa vakillariga tibbiy-ijtimoiy xizmatlar koʻrsatish, ularning bilim olishi, mehnat qilishi, malakali tibbiy xizmatlardan foydalanishi, oʻz isteʼdod va salohiyatini roʻyobga chiqarishi, muxtasar aytganda, oʻzlarini jamiyatimizning toʻlaqonli aʼzosi deb his etishlari uchun yanada qulay sharoitlar yaratish imkonini bermoqda.

Bugun, butun xalqimizga murojaat qilib, siz, aziz vatandoshlarimni bu yoʻnalishda boshlagan xayrli ishlarimizni faol davom ettirishga chaqiraman. Shu maqsadda, biz barcha fuqarolar, jumladan, nogironligi boʻlgan shaxslar uchun bir xil imkoniyatlar amal qiladigan inklyuziv jamiyatni barpo etish boʻyicha kompleks chora-tadbirlarni amalga oshiramiz. Shu asosda nogironlikni belgilashning allaqachon eskirgan tibbiy modelidan umumeʼtirof etilgan ijtimoiy modeliga bosqichma-bosqich oʻtishni oʻz oldimizga muhim vazifa qilib qoʻyganmiz.

Bundan buyon bino va inshootlarni qurish, rekonstruksiya qilish, jamoat transporti, axborot va aloqa vositalarini ishlab chiqarishda nogironligi boʻlgan shaxslarning ulardan hech bir moneliksiz foydalana olishiga birlamchi ahamiyat qaratiladi.

Nogironligi bor shaxslarni reabilitatsiya qilish va protezlash markazlaridagi qamrov hajmini 2 barobar oshirish, hududlarda faoliyat koʻrsatayotgan 10 ga yaqin shunday markazlarni kengaytirib, zamonaviy tibbiy va reabilitatsiya uskunalari bilan jihozlash ishlari amalga oshiriladi.

Ishontirib aytamanki, sizlar oʻzlaringizni yolgʻiz his etmasligingiz, zarur bilim va kasb-hunarlarni egallab, barcha soha va tarmoqlarda faol ishtirok etishingiz, jismoniy tarbiya va sport bilan shugʻullanishingiz, madaniy ehtiyojlaringizni taʼminlashingiz uchun bor kuch va imkoniyatlarni safarbar etamiz.

Fursatdan foydalanib, barchangizga sihat-salomatlik, tinchlik-xotirjamlik, oilaviy baxt-saodat va omad tilab qolaman.

Chuqur hurmat bilan,

Shavkat MIRZIYOYEV,

Oʻzbekiston Respublikasi Prezidenti