2022 yil 3 dekabr kuni “Inson huquqlari sohasida ta’lim” Global forumining xorijiy ishtirokchisi – Tartu universitetining yuridik fakulteti, “Xalqaro huquq va inson huquqlari” magistrlik dasturi rahbari, Yevropa Kengashi maslahatchisi Elizabet Kasa-Melksoo mamlakatimiz poytaxtiga yetib keldi. Mehmonni Inson huquqlari bo‘yicha O‘zbekiston Respublikasi Milliy markazining Toshkent xalqaro aeroportidagi shtabi mas’ullari kutib oldilar.

Elizabet Kasa-Melksoo inson huquqlari va demokratik fuqarolik jamiyati qadriyatlari, madaniyatlararo ta’lim mavzularida treninglar olib boradi. Yevropa yoshlari, talabalar, o‘qituvchilar, yoshlar bilan ishlaydigan mutaxassislar va ijtimoiy soha, nodavlat notijorat tashkilotlari, davlat organlari xodimlari hamda diplomatik korpus vakillari va jurnalistlar o‘rtasida ta’lim tadbirlarini tashkil etish bilan shug‘ullanadi.

E.Kasa-Melksoo nafaqat Yevropa Kengashi maslahatchisi hisoblanadi, balki bu yo‘nalishda Yevropa komissiyasining "Erazmus+" dasturi, Estoniyadagi Gender tenglik masalalari bo‘yicha komissar Boshqarmasi, Estoniyaning Inson huquqlari instituti va boshqa ko‘plab maktablar hamda ta’lim muassasalari bilan ham yaqindan hamkorlik qiladi. Shuningdek, u Tartu universitetining Yuridik fakultetida inson huquqlari sohasi ta’limi bo‘yicha dars beradi.

Elizabet Kasa-Melksoo Samarqand Global forumining birinchi kuni 4-parallel sessiyada “Fuqarolik jamiyati uchun inson huquqlari sohasidagi norasmiy ta’lim” mavzusida ma’ruza qiladi.

Inson huquqlari bo‘yicha
O‘zbekiston Respublikasi
Milliy markazining
matbuot xizmati