Global forumning asosiy ma’ruzachisi bilan eksklyuziv intervyu

Samarqandda o‘tayotgan “Inson huquqlari sohasida ta’lim” Global forumi ishtirokchisi, BMTning Inson huquqlari bo‘yicha Oliy kamissari boshqarmasi inson huquqlari sohasida ta’lim va tarbiya bo‘limi koordinatori Yelena Ippoliti o‘z fikrlarini bildirdi.

– Global forumda ishtirok etayotganimdan juda mamnunman. BMTning Inson huquqlari bo‘yicha Oliy komissari boshqarmasi qarorgohida faoliyat yuritaman. Samarqandda o‘tayotgan mazkur anjuman doirasida ko‘plab mintaqaviy va xalqaro tashkilotlar vakillari ishtirokida ayni mavzu yuzasidan keng muhokama bo‘layotgani, muammolarga eng qulay yechim topish bo‘yicha amaliy takliflar berilayotgani asosiy yutug‘imiz, degan bo‘lardim.

Biz uchun xalqaro miqyosda hal qilinadigan masalalar bo‘yicha mahalliy choralar ko‘rilayotgani quvonarli. BMTning Markaziy Osiyo mintaqaviy vakolatxonasi ushbu tadbirni O‘zbekiston hukumati va inson huquqlari bo‘yicha Milliy markaz bilan birga tashkil etdi.

Taassurotlarim bir olam. Forumning ochilish sessiyasi anjuman mazmun-mohiyatini aks ettirdi, inson huquqi sohasidagi ta’lim ustuvorligining dolzarb qirralarini ochib berdi. Nogironligi bo‘lgan shaxslar huquqi bo‘yicha ta’lim, inson huquqiga qarshi xavfni bartaraf etish bilan bog‘liq masalalar anjumanning yetakchi mavzusiga aylandi.

Tadbirda bir necha istiqbolli loyiha ko‘rib chiqildi. O‘zbekistonda mazkur sohada kechayotgan ijobiy o‘zgarishlar meni xursand kildi. Inson huquqi bo‘yicha ta’lim masalasi global miqyosda hukumatlar tomonidan muhokama qilinishi zarurligi to‘g‘risida tavsiyalar berildi. Muhimi, mazkur tavsiyalarni hayotga tatbiq etish shart. Inson huquqi sohasidagi ta’limning asl ahamiyati mahalliy va milliy darajada barcha fuqarolar manfaati uchun yo‘naltirilganida.

Inson huquqi bo‘yicha ta’lim dasturi barcha mamlakatlarda ayni yo‘nalishdagi ta’limni milliy darajada joriy etishni rag‘batlantiradi. Oliy o‘quv yurtlarida inson huquqi bo‘yicha ta’limni birlashtirishga qaratilgan yana bir bosqich davlat xizmatchilarini, jurnalistlarni inson huquqi bo‘yicha o‘qitishni nazarda tutadi. Ayni payt yoshlar uchun ta’limning so‘nggi bosqichi davom etyapti. Ushbu global dastur orqali turli mamlakatlarda milliy darajada muayyan yutuqlarga erishyapmiz.

Inson huquqi bo‘yicha ta’limni milliy qonunchilikka kiritish zarur. Bu jarayon, o‘z navbatida, saviyali o‘qituvchilar tayyorlashni talab kiladi. Zero, yaxshi qonun bo‘lishi mumkin, ammo o‘qituvchi ishni maktabda qanday tashkil etishni bilmasa, natijaga erisha olmaydi. Bundan tashqari ba’zi darsliklarni tuzatish kerak, chunki maktab darsliklarida ko‘pgina qoliplar mavjud.

Jarayonni muntazam ravishda takomillashtirish kerak. Shuningdek, inson huquqi bo‘yicha ta’lim yangi avlodni qamrab olsa, maqsadga muvofiq bo‘lardi. Yana bir diqqat markazidagi mavzu – oliy ta’lim tizimida inson huquqi.

Xullas, bu mavzuda juda ko‘p fikr bildirish mumkin. Eng muhimi, global forum, davra suhbati va boshqa tadbirlar doirasida dadil qadamlar tashlanmoqda.

Behruz Xudoyberdiyev yozib oldi.

Doniyor Yoqubov tasviri, O‘zA