OSTONA, 5-dekabr. /“Dunyo” AA/. Bugun Qozog‘istonning  “Infozakon” ommabop internet-nashri sahifasida «Akmal Saidov: Odamlar o‘z huquqlarini bilishi va himoya qilishi, himoya qilinishiga ishonch hosil qilishi kerak» savlovhali maqola eʼlon qilindi, deb xabar bermoqda “Dunyo” AA muxbiri.

Unda O‘zbekistonda inson huquqlari sohasida, jumladan, bu yo‘nalishda taʼlim tizimini takomillashtirish borasida katta ishlar amalga oshirilgani qayd etilgan. «Inson huquqlari sohasidagi taʼlim O‘zbekistonda inson huquqlari madaniyatini shakllantirishga doir davlat siyosatining ustuvor yo‘nalishlaridan biridir, deyiladi maqolada. Prezident Shavkat Mirziyoyev tomonidan inson huquqlari, erkinliklari va qonuniy manfaatlarini har tomonlama taʼminlashga qaratilgan tashabbuslar ilgari surilib, ular hayotga izchil tatbiq etilmoqda. Ular asosida BMT Bosh Assambleyasining beshta rezolyutsiyasi allaqachon qabul qilingan».

Maqolada taʼkidlanganidek, O‘zbekiston milliy davlatchilik tarixida birinchi marta BMT Inson huquqlari kengashiga saylandi.

Materialda  maʼlum qilinganidek, Prezident farmoyishi bilan Oliy Majlis Senati, Tashqi ishlar, Adliya, Oliy va o‘rta maxsus taʼlim, Xalq taʼlimi, Mahalla va oilani qo‘llab-quvvatlash vazirliklari, Yoshlar ishlari agentligi, Ombudsman, Kasaba uyushmalari federatsiyasi kengashi, nodavlat notijorat tashkilotlari, ommaviy axborot vositalari vakillari, shuningdek, mintaqalar rahbarlari iborat Inson huquqlari sohasida Jahon taʼlim dasturining to‘rtinchi bosqichini amalga oshirish yuzasidan Milliy komissiya tuzildi. «Milliy komissiyaning asosiy maqsadi inson huquqlarini himoya qilishning umuminsoniy meʼyor va tamoyillari, inson huquqlari va asosiy erkinliklarini himoya qilishning xalqaro kafolatlari haqida aholining xabardorligini oshirish hamda bu boradagi ishlarni yana-da samarali olib borishdan iboratdir», deb  yozadi “Infozakon”.