Bundan to‘rt oy ilgari Prezidentimiz Shavkat Mirziyoev Samarqand shahrining qadimiy Konigil mavzesida “Buyuk ipak yo‘li” xalqaro turizm markazining ochilishiga bag‘ishlangan tantanali marosimda: “Bu ulkan markaz buyuk ajdodlarimiz bunyod etgan muhtasham me’moriy obidalarga munosib bo‘lib, ularning tarixiy an’analarini davom ettiradi. Ushbu majmua mamlakatimizda hozirgi paytda poydevori qurilishi boshlangan Uchinchi Renessans va oldingi tarixiy davrlar o‘rtasidagi ramziy ko‘prik bo‘ladi”, deb ta’kidlagani bejiz emas.

“Buyuk ipak yo‘li” markazi qisqa fursatda jahon xalqlari uchun do‘stlik va tinchlik timsoliga, tom ma’noda, olamshumul tashabbuslar ro‘yobga chiqadigan siyosat va huquq, ilm-fan va ma’rifat maydoniga aylandi. Buni 2022 yil 5 dekabr kuni ushbu mahobatli majmuada “Inson huquqlari sohasida ta’lim” Global forumi o‘z ishini boshlagani yana bir bor tasdiqlaydi.

Bundan 5 yil oldin dastlabki Inson huquqlari bo‘yicha Osiyo forumi tashkil qilinib, inson huquqlari sohasidagi global muammolarning Samarqanddagi muhokamasi yo‘lga qo‘yilgandi. O‘shanda inson huquqlari muhokamasida “Samarqand ruhi” paydo bo‘ldi. 2020 yilda onlayn formatda o‘tkazilgan ikkinchi Samarqand forumi yoshlar huquqiga bag‘ishlandi.

Bu galgi uchinchi Samarqand forumi – Global forumda O‘zbekiston Respublikasi Prezidenti tomonidan BMT Bosh Assambleyasining 76-sessiyasi va Inson huquqlari kengashining 46‑sessiyasida ilgari surilgan tashabbus asosida inson huquqlari sohasida ta’limni rivojlantirish muammolari muhokama qilinadi. Shu munosabat bilan Inson huquqlari o‘yicha O‘zbekiston Respublikasi Miliy markazi direktori Akmal Saidov Global forumni ochar ekan, tadbirni “Inson huquqlari bo‘yicha ta’lim: deklaratsiyadan – amaliyotga” shiori asosida o‘tkazishni taklif qildi.

Ochilish marosimida BMTning Inson huquqlari bo‘yicha Oliy komissari Folker Tyurk videomurojaati; BMTning O‘zbekistondagi Doimiy muvofiqlashtiruvchisi v.b. Munir Mamedzade tabrigi; BMTning Inson huquqlari bo‘yicha kengashi raisi, elchi Federiko Vilegas videomurojaati; YeXHT Demokratik institutlar va inson huquqlari bo‘yicha byurosi direktori Matteo Mekachchi tabrigi, Yevropa Kengashi Inson huquqlari va qonun ustuvorligi boshqarmasi bosh direktori Xristos Giyakumopulos videomurojaati tinglandi. MDH Ijroiya qo‘mitasi raisi – Ijrochi kotibi Sergey Lebedev nutqini MDH Ijroiya qo‘mitasi raisi o‘rinbosari – Ijrochi kotibi Beketjan Jumaxanov o‘qib eshittirdi.

Global forumda xalqaro, mintaqaviy va xorijiy tashkilotlarning 100 nafardan ortiq vakili off-layn va on-layn tarzda ishtirok etmoqda. Jumladan, 10 ta xalqaro va 6 ta mintaqaviy tashkilot, 30 davlatdan inson huquqlari bo‘yicha yetakchi xorijiy ekspertlar hamda professor-mutaxassislar qatnashmoqda.

Forum ishtirokchilari safida, shuningdek, 150 ta milliy tashkilotning 2 ming nafardan ziyod vakili bor. Ular asosan 20 ta vazirlik va idoralar, yurtimizning barcha hududlaridan 50 ta oliy ta’lim muassasasi va ilmiy tashkilotlar, 60 dan ortiq fuqarolik jamiyat instituti, jumladan, yoshlar tashkilotlari faollaridan iborat.

Global forum ishini milliy ommaviy axborot vositalari va mamlakatimizda akkreditatsiyadan o‘tgan xorij muxbirlari yoritmoqda. Xalqaro anjuman tafsilotlari Internet, ijtimoiy tarmoqlar, jumladan Yu-tub kanali orqali jonli efirga uzatilmoqda.

Ishtirokchilarga inson huquqlari sohasida ta’lim mavzuiga oid 10 dan ortiq adabiyot hamda “Demokratlashtirish va inson huquqlari” jurnalining maxsus soni taqdim etildi.

Inson huquqlari bo‘yicha
O‘zbekiston Respublikasi
Milliy markazining
matbuot xizmati

Samarqand viloyati hokimligi veb-sayti

QMPTI