Inson huquqlari bo‘yicha O‘zbekiston Respublikasi Milliy markazida “Inson huquqlari kelajak avlodlar uchun” mavzusida davra suhbati bo‘lib o‘tdi. Yurtimiz o‘quvchi-talabalari o‘rtasida yozgi maktab va tanlovlar o‘tkazish doirasida tashkil etilgan ushbu tadbir Butunjahon yoshlar kuni va Inson huquqlari umumjahon deklaratsiyasi qabul qilinganligining 75 yilligiga bag‘ishlandi.

Ishtirokchilarga O‘zbekiston Respublikasi Oliy Majlisi Qonunchilik palatasi Spikerining birinchi o‘rinbosari, O‘zbekiston Respublikasi Milliy markazi direktori Akmal Saidov qutlov so‘zi bilan murojaat qildi.

BMT Bosh Assambleyasi rezolyusiyasi bilan 12 avgust – Xalqaro yoshlar kuni deb e’lon qilingan. Bu sananing nishonlanishidan asosiy maqsad  yosh avlodning jamiyat taraqqiyotidagi o‘rni haqida eslatish, shuningdek, yoshlar muammolarini muhokama qilishdir. Ushbu tadbir har yili muayyan shior ostida o‘tkaziladi. 2023 yilgi shiori: “Yoshlar uchun yashil ko‘nikmalar: barqaror dunyoni barpo etish yo‘lida” deb nomlanadi.

Bu bejiz emas. Chunki bugungi kunda jahon miqyosida ekologik turmush tarziga o‘tish dolzarb masalaga aylandi. Bu jahonda yuz berayotgan global iqlim o‘zgarishi inqirozini yengish hamda Barqaror rivojlanish maqsadlariga erishish uchun juda muhim ahamiyatga ega. Yashil dunyoga muvaffaqiyatli o‘tish aholida yashil turmush tarzi ko‘nikmalarining rivojlanishiga bog‘liq.

Yashil ko‘nikmalar – bu barqaror va resurslardan tejamkor foydalanadigan jamiyatda yashash, uni rivojlantirish va qo‘llab-quvvatlash uchun zarur bilim, qobiliyat, qadriyatlar va munosabatlardir. Bunday ko‘nikmalar avvalambor kelajak avlod uchun va uning ishtirokida barqaror dunyoni barpo etish uchun muhimdir.

Bugungi kunda yoshlar mamlakatning barcha muhim tarmoqlariga jalb qilingan, vazirlik va idoralarda muhim lavozimlarni egallab turibdi. Yoshlar bilan ishlash bo‘yicha alohida davlat organi va tashkilotlar ham shakllandi. Yoshlarni o‘qitish va har tomonlama barkamol qilib voyaga yetkazish uchun zarur sharoitlar yaratilmoqda.

Yangilanayotgan O‘zbekistonning yosh avlodni ijtimoiy, siyosiy, iqtisodiy va huquqiy islohotlarga keng jalb etish, ularga mamlakatimizning buguni va ertangi kuni bilan bog‘liq o‘ta muhim vazifalar ijrosini ishonib topshirish borasidagi tajribasi dunyo hamjamiyati tomonidan keng e’tirof etilmoqda. Umumxalq referendumida yangi tahrirda qabul qilingan Konstitutsiyamizda ham bu g‘oya va tamoyil konstitutsiyaviy mustahkamlandi.

Yoshlarga Asosiy qonunimizning alohida bobi bag‘ishlandi – Konstitutsiyaning 14-bobi “Oila, bolalar va yoshlar” deb nomlandi hamda unda yoshlarga oid qator normalar o‘rin oldi. Bunday konstitutsiyaviy darajadagi yondashuv Yangi O‘zbekistonda yoshlar huquq va manfaatlarini ta’minlash ustuvor ekanligidan yaqqol dalolatdir.

Tadbirda Oliy Majlis Qonunchilik palatasining Yoshlar masalalari komissiyasi a’zolari, O‘zbekiston Ekologik partiyasi Markaziy kengashi vakillari, Milliy markaz, Yoshlar ishlari agentligi, Oliy ta’lim, fan va innovatsiyalar vazirligi xodimlari, O‘zbekiston yoshlar ittifoqi va boshqa yoshlar jamaot birlashmalari vakillari ishtirok etdi.

Tadbir doirasida yoshlar huquqlarini himoya qilish va ta’minlashga oid asosiy jihatlar ko‘rib chiqildi. Tadbir ishtirokchilari sifatli ta’lim, ijtimoiy hayotda faol ishtirok etish va yoshlar bilan bog‘liq boshqa ko‘plab sohalarni qamrab olgan masalalarni muhokama qildilar.

Muhokamalarda mamlakatimizning turli hududlaridan bo‘lgan yuzdan ortiq yoshlar vakillari faol ishtirok etib, o‘z fikr-mulohazalarini bildirdi. Jumladan, inson huquqlarini himoya qilishning xalqaro mexanizmlari, ularning jahon miqyosida inson huquqlariga rioya etilishi va himoya qilinishini rag‘batlantirishdagi o‘rni hamda samaradorligi muhokamalardan joy oldi.

Tadbirda yashil ko‘nikmalar va yoshlar huquqlari o‘rtasidagi munosabatni tushunish masalasi ham ko‘tarildi. Ishtirokchilar ekologik ko‘nikmalarni rivojlantirish insonning yashash huquqi, xavfsizlik va atrof-muhitni muhofaza qilish kabi asosiy huquqlariga bevosita mutanosib ekanligini ta’kidladilar.

Ishtirokchilar o‘zaro fikr almashib, yoshlar huquqlari himoyasini takomillashtirishga qaratilgan o‘z takliflarini bildirdilar.

Mazkur davra suhbati davlat organlari, jamoat birlashmalari va yoshlar o‘rtasidagi muloqot maydoniga aylandi. Tadbirda bildirilgan muhokamalar natijalari va tavsiyalar yoshlar huquqlarini himoya qilish sohasida davlat organlari va jamoat birlashmalarining amaliy faoliyatida qo‘llaniladi.

Oʼzbekiston Respublikasi
Oliy Majlisi
Qonunchilik palatasi