– Yevropada xavfsizlik va hamkorlik tashkilotiga a’zo mamlakatlar inson huquqlari sohasidagi ta’lim taqdirulamal ahamiyatga egaligini chuqur anglaydilar, – dedi YeXHT Demokratik institutlar va inson huquqlari bo‘yicha byurosi direktori Matteo Mekachchi. – Shuning uchun ular o‘z fuqarolarining inson huquqlari va asosiy erkinliklari bo‘yicha yetarli bilimlarga ega bo‘lishi muhimligini doim e’tiborda tutadilar.

Biz, shuningdek, barcha fuqarolar uchun xavfsiz va obod jamiyat barpo etish borasidagi sa’y-harakatlarimizga yoshlarni ham jalb etish zarurligini tobora chuqurroq tushunib yetmoqdamiz. Zotan, aslida ham, jamiyat hayotini to‘laqonli deb baholashimiz uchun unda yosh avlodning ishtirok etishi taqozo etiladi.

Afsuski, ayni yo‘nalishlarda yangrayotgan xalqaro va milliy darajalardagi chaqiriqlarga qaramay, YeXHT hududidagi ayrim mamlakatlarda inson huquqlari sohasidagi ta’lim haligacha oqsayotganidan ko‘z yumib bo‘lmaydi. Aytaylik, inson huquqlari sohasidagi ta’limni o‘quv dasturlariga kiritish, turli yoshdagi o‘quvchi va talabalar uchun mo‘ljallangan o‘quv qo‘llanmalari yaratish ishlariga keyingi yillarda ko‘p ham e’tibor qaratilmayotgan holatlar mavjud.

Xolbuki, inson huquqlari sohasidagi ta’lim – doimiy e’tiborni talab qiladigan uzoq muddatli sarmoyadir. Uni ko‘pincha kutilgan samarani bermaydigan qisqa muddatli har xil loyihalar bilan almashtirmaslik lozim va shart.

Inson huquqlari sohasidagi ta’limni amalga oshirishning ikki tomoni borligini ham yaxshi anglashimiz lozim. Bir tomondan, kishilarning inson huquqlari bo‘yicha xabardorligi va bilimini oshirishimiz kerak. Ikkinchi tomondan esa, inson huquqlari sohasidagi ta’limning ta’lim tizimidan o‘rin olishiga intilishimiz darkor.

Shu nuqtai nazardan, Samarqand Global forumi inson huquqlari sohasidagi ta’limni butun mintaqamiz ko‘lamida rivojantirishda muhim ahamiyat kasb etadi, deb hisoblayman. Binobarin, bunday ta’lim jamiyat hayoti yaxshilanishi va demokratiya rivojlanishi yo‘lida munosib hissa qo‘shadigan qobil hamda qat’iyatli fuqarolar shakllanishiga xizmat qiladi.

G‘ulom MIRZO yozib oldi