Mamlakatimizda joriy yilning 22-23 noyabr kunlari Samarqand shahrida bo'lib o'tadigan Inson huquqlari bo'yicha Osiyo forumiga qizg'in tayyorgarlik ko'rilmoqda. Bo'lajak yirik xalqaro anjuman Inson huquqlari umumjahon deklaratsiyasi qabul qilinganining 70 yilligiga bag'ishlangan.

Shu maqsadda 2018 yil 21 noyabr kuni Inson huquqlari bo'yicha O'zbekiston Respublikasi Milliy markazi hamda Xalqaro press-klub tomonidan Inson huquqlari bo'yicha Osiyo forumi oldidan matbuot anjumani tashkil etildi.

Ushbu “Press-brifingda” Inson huquqlari bo'yicha O'zbekiston Respublikasi Milliy markazi direktori A.X.Saidov hamda xalqaro va mintaqaviy tashkilotlar, Yevropada xavfsizlik va hamkorlik tashkilotining Demokratik institutlar va inson huquqlari bo'yicha byurosi, demokratiklashtirish departamenti boshlig'i Marchin Valetski; BMTning O'zbekistondagi doimiy vakili va BMTTDning O'zbekistondagi doimiy vakili Xelena Freyzer; BMTning Bosh kotibining o'rinbosari, Jenevadagi BMT idorasining Bosh direktori Mixael` Myoller; BMTning Markaziy Osiyoda Inson huquqlri bo'yicha Oliy komissarining mintaqaviy vakili Rishard Komenda vakillari ishtirok etdilar.

Ma'lumki, O'zbekiston Respublikasi Prezidenti SH.M. Mirziyoev 2017 yil sentyabr oyida bo'lib o'tgan Birlashgan Millatlar Tashkilotining 72-sessiyasi minbaridan bir qator muhim xalqaro tashabbuslarni ilgari surdi. Jumladan, o'shanda mamlakatimiz rahbari BMT Inson huquqlari bo'yicha Oliy komissari bilan muloqoti chog'ida Inson huquqlari umumjahon deklaratsiyasi qabul qilinganining 70 yilligi munosabati bilan Samarqand shahrida Inson huquqlari bo'yicha Osiyo forumini o'tkazish tashabbusi bilan chiqqandi.

Inson huquqlari umumjahon deklaratsiyasi qabul qilinganidan buyon o'tgan 70 yil ichida inson huquqlariga bag'ishlangan bunday yuksak nufuzga ega xalqaro anjuman ilk bor Osiyo qit'asida – O'zbekistonda, qadimiy va hamisha navqiron Samarqand shahrida tashkil etilmoqda. Eng asosiysi, ushbu dolzarb tashabbus xalqaro hamjamiyat tomonidan keng qo'llab-quvvatlanmoqda.

Samarqand shahrida Inson huquqlari bo'yicha Osiyo forumi tashkil etilishi Inson huquqlari umumjahon deklaratsiyasi tamoyillariga e'tiborni yanada oshiradi. Bu, shuningdek, O'zbekistonda inson huquqlari sohasida izchil va shiddatli islohotlar amalga oshirilayotganini anglatadi.

Osiyo forumining asosiy ish faoliyati inson huquqlarini himoya qilish bo'yicha qit'amizdagi mavjud mexanizmlarni yanada takomillashtirish va yangilarini ta'sis etish, inson huquqlari bo'yicha milliy institutlar o'rtasida o'zaro hamkorlikni ta'minlash yuzasidan amaliy tavsiyalar ishlab chiqishga qaratiladi.

Xalqaro anjuman ishtirokchilari to'rtta sessiyada muayyan mavzular bo'yicha muloqot olib boradi.

Birinchi sessiya – “Inson huquqlari umumjahon deklaratsiyasi merosi – universallik va inson huquqlari”, deb nomlanadi. Ushbu sessiya iqtisodiy, ijtimoiy, madaniy, fuqarolik va siyosiy huquqlarning universalligi va o'zaro bog'liqligi printsiplariga bag'ishlanadi. Unda inson huquqlarini ta'minlash sohasidagi majburiyatlarning bajarilishi borasida erishilgan yutuqlar va mavjud muammolar ko'rib chiqiladi.

Ikkinchi sessiya – “Inson huquqlari – Barqaror rivojlanish maqsadlarini ta'minlash asosi sifatida”, deb nomlangan. Unda BMT belgilagan maqsadlarga erishish uchun inson huquqlarini himoya qilish va ta'minlashda davlatning qonun chiqaruvchi, ijro etuvchi va sud hokimiyatlari hamda inson huquqlari bo'yicha milliy institutlarning tutgan o'rni va ahamiyati muhokama qilinadi.

Uchinchi sessiya – “Inson huquqlari sohasi ta'limi: innovatsiyalar va yangi da'vatlar”. Mazkur sessiya keng aholi qatlamlariga inson huquqlari masalalari bo'yicha ta'lim berishni tashkil etish sohasidagi yangicha yondashuvlar va innovatsiyaviy yechimlar tahliliga
bag'ishlanadi.

To'rtinchi sessiya – “Inson huquqlari bo'yicha milliy institutlarning inson huquqlari hurmat qilinishi, himoya etilishi hamda ularga rioya qilinishini ta'minlash masalalarida davlat organlari va fuqarolik jamiyati institutlari bilan o'zaro hamkorligi”, deb ataladi. Forum ishtirokchilari ushbu sessiyada inson huquqlari himoya etilishini ta'minlashda inson huquqlari bo'yicha milliy institutlar, davlat organlari va fuqarolik jamiyati institutlari o'zaro hamkorlikda qo'llaydigan mexanizmlar, vositalar va yondashuvlar
xususida so'z yuritadilar.

Inson huquqlari bo'yicha Osiyo forumida biz yashab turgan ko'hna qit'ada inson huquqlari, erkinliklari va qonuniy manfaatlari ta'minlanishi borasida erishilgan natijalar ko'rib chiqiladi. Bu boradagi ilg'or tashabbuslarga atroflicha baho beriladi.

Shuningdek, asosiy e'tibor inson huquqlarini himoya qilish bo'yicha Osiyo qit'asidagi mavjud mexanizmlarni yanada takomillashtirish va yangilarini ta'sis etish, inson huquqlari bo'yicha milliy institutlar o'rtasida o'zaro hamkorlikni ta'minlash yuzasidan amaliy tavsiyalar ishlab chiqishga qaratiladi.

Osiyo forumi yakunida Inson huquqlari bo'yicha Samarqand deklaratsiyasini qabul qilish rejalashtirilgan. Ushbu yakuniy hujjat Inson huquqlari umumjahon deklaratsiyasi va Barqaror rivojlanish maqsadlarida belgilangan vazifalarni yanada samarali bajarish istiqbollariga bag'ishlanadi.