Jahon skautlar harakati tashkilotining xilma-xillik, madaniyat va inklyuzivlik bo‘limi menejeri Sian Begshou “Inson huquqlari sohasida ta’lim” mavzusidagi Global forumda shu fikrni ilgari surdi.

Xorijiy ekspert yoshlar faol fuqarolik jamiyati yaratish ishiga hissa qo‘shishlari uchun norasmiy ta’lim orqali ularda raqobatbardoshlik qobiliyatini oshirish maqsad qilinganini ta’kidladi:

– Tashkilotimiz haqida kengroq ma’lumot berish, norasmiy ta’lim tizimi orqali yoshlarning inson huquqi sohasida jamiyatdagi hal qiluvchi bo‘g‘inga aylanishiga erishishi yo‘lida ish olib borayotganimiz to‘g‘risida ko‘proq mutaxassislarni xabardor etish uchun Samarqandga kelganman. Tuzilmaga dunyo bo‘ylab 173 tashkilot, 57 million kishi a’zo. Ular dunyoni yaxshi tomonga o‘zgartirishga ko‘maklashyapti, deyish mumkin. Jamiyatdagi ijtimoiy inklyuziyada, ayniqsa, inson huquqi sohasida norasmiy ta’limni qo‘llab-quvvatlash muhim ahamiyat kasb etadi.

S.Begshou, shuningdek, tashkilotning asosiy maqsadi va vazifasi jamiyatda huquqdan foydalanish hamda ta’lim olish imkoniyati darajasini oshirish ekanini ma’lum qildi.

– Butunjahon ta’lim harakati sifatli ta’lim berishga asoslangan. Forumdan kutilayotgan natija – inson huquqi doirasida yoshlarga norasmiy uslubda ta’lim berish imkoniyatni kengaytirish. Zero, norasmiy ta’lim, aynan, inson huquqi sohasidagi harakatlarimiz namunasidir.

B.Xudoyberdiyev, O‘zA