2018 yil 10 dekabr kuni «Inson huquq va erkinliklarining konstitutsiyaviy kafolatini mustahkamlash – O'zbekiston Respublikasidagi demokratik islohotlar yangi bosqichining muhim yo'nalishi» mavzusida xalqaro anjuman bo'lib o'tdi.

Ushbu tadbir Inson huquqlari bo'yicha O'zbekiston Respublikasi Milliy markazi, O'zbekiston Respublikasi Adliya vazirligi, O'zbekiston Respublikasi Bosh prokuraturasi, O'zbekiston Respublikasi Ichki ishlar vazirligi, O'zbekiston Respublikasi Sud`yalar oliy kengashi huzuridagi Odil sudlov muammolarini o'rganish tadqiqot markazi, BMTTD, YEXHT loyihalari koordinatori, AQSH Xalqaro taraqqiyot agentligi (USAID), F.Ebert nomidagi jamg'arma, “Mintaqaviy muloqot” xalqaro nodavlat tashkiloti tomonidan tashkillashtirildi.

Xalqaro anjuman ishida senatorlar, deputatlar, manfaatdor vazirliklar, idoralar, huquqni muhofaza qiluvchi organlar, inson huquqlari bo'yicha milliy institutlar, ilmiy va ta'lim muassasalari, fuqarolik jamiyati institutlari vakillari, shuningdek xalqaro ekspertlar G.Klemenchich (Sloveniya), A.Xederix (Sloveniya), A.Guardino (AQSH) ishtirok etdi.

Anjuman xalqaro hamjamiyatni O'zbekistonda davlat organlari faoliyatida inson huquq va erkinliklarini ishonchli himoya qilishni, qonuniylikka erishish va qonun ustuvorligini ta'minlash sohasida amalga oshirilayotgan izchil ishlar bilan tanishtirish maqsadida o'tkazildi. U Inson huquqlari umumjahon deklaratsiyasining 70 yilligiga bag'ishlandi.

Anjumanda O'zbekiston Respublikasi Prezident SH.M.Mirziyoevning mamlakatimizdagi tub islohot va o'zgarishlarning barchasi Konstitutsiyamiz asosida amalga oshirilayotgani haqidagi fikrlariga e'tibor qaratildi. Haqiqatan ham, Bosh Qomusimiz xalqimiz manfaatlariga, davlatimizning strategik maqsadlariga to'la javob beradigan, har tomonlama puxta ishlangan muhim siyosiy hujjatdir. Ayni paytda biz Asosiy qonunimiz talablarini to'liq amalga oshirish borasida hali oldimizda ulkan vazifalar turganini yaxshi tushunamiz. Ya'ni, xalqimiz hayot darajasi va sifatini yanada yaxshilash, inson huquq va manfaatlarini amalda ta'minlash bo'yicha hali ko'p ish qilishimiz kerak.

Shu maqsadda o'tgan yili mamlakatimizda 2017-2021 yillarda O'zbekiston Respublikasini rivojlantirishning beshta ustuvor yo'nalishi bo'yicha Harakatlar strategiyasi qabul qilindi.

Mazkur hujjat mohiyatiga ko'ra jamiyat hayotining barcha sohalaridagi tizimli islohotlarning “yo'l xaritasi”ga aylandi”.

Anjuman davomida O'zbekiston Respublikasi Konstitutsiyasi inson huquq va erkinliklariga rioya qilishning ishonchli kafili ekanligi qayd etildi. Konstitutsiyada O'zbekistonning demokratiya va ijtimoiy adolatga sodiqligi, insonparvar demokratik huquqiy davlat barpo etish ustuvor vazifa sifatida belgilab olingani mustahkamlab qo'yilgan.

Xalqaro anjuman ishtirokchilari tomonidan inson huquq va erkinliklarini konstitutsiyalashtirishning asosiy tendentsiyalari, ushbu sohada davlat institutlari va jamoatchilik tuzilmalari faoliyatini tatibga solishning konstitutsiyaviy mexanizmlari;

konstitutsiyaviy rivojlanish nuqtai nazaridan inson huquqlari xalqaro va milliy standartlarining o'zaro aloqasi va ta'siri masalalarida zamonaviy yondashuvlar;

qonunchilikning Konstitutsiya qoidalariga muvofiqligi ustidan konstitutsiyaviy nazoratning ilg'or ko'rinishlari, fuqarolar huquqlarini himoya qilishni ta'minlashda konstitutsiyaviy adolatning roli muhokama qilindi. Davlat va jamiyat faoliyatida jamoatchilik boshqaruvining ko'rinishlari va yo'nalishlarini, davlat hokimiyati va boshqaruvi organlari, shu bilan birga huquqni muhofaza qiluvchi va nazorat tuzilmalari faoliyati ustidan jamoatchilik nazoratini takomillashtirishda Konstitutsiya qoidalarining ta'sirini kuchaytirish masalalari ko'rib chiqildi.

Xalqaro anjumanda O'zbekiston Respublikasi Konstitutsiyasi inson huquq va erkinliklari sohasida xalqaro huquqning umume'tirof etilgan tamoyillari va normalariga, birinchi navbatda Inson huquqlari umumjahon deklaratsiyasi qoidalariga to'la muvofiqligi qayd etildi. Binobarin, O'zbekiston Respublikasi Konstitutsiyasida Inson huquqlari umumjahon deklaratsiyasida mavjud inson huquq va erkinliklarining barchasi, ya'ni insonning shaxsiy, siyosiy, ijtimoiy-iqtisodiy va madaniy huquqlar va asosiy erkinliklari mustahkamlangan.

O'zbekiston Respublikasi Konstitutsiyasinig xalqaro ahamiyati unda demokratik jamiyatning oliy qadriyatlari – inson, uning hayoti, erkinligi, sha'ni, qadr-qimmati va boshqa daxlsiz huquqlari mustahkamlanganligida yaqqol namoyon bo'ladi. O'zbekiston Konstitutsiyasida bevosita va milliy qonunchilikka implementatsiya qilish yo'li bilan amalga oshiriladigan xalqaro huquqning umume'tirof etilgan tamoyillari ustuvorligi e'lon qilingan.

O'zbekiston Respublikasi Konstitutsiyasida istisno hollarda inson huquq va erkinliklarining cheklanishi mumkinligi bo'yicha xalqaro standart va asoslar mujassam. Bu Inson huquqlari umumjahon deklaratsiyasining inson huquq va erkinliklari cheklanishi jamoatchilik nazorati, jamoatchilik xulqini himoya qilish va boshqa shaxslar huquq hamda erkinliklarini himoya qilish zarur bo'lgan hollarda, shuningdek qonunda mustahkamlangan asoslar bo'yicha amalga oshirilishi mumkinligi to'g'risidagi 29-moddasini implementatsiya qilinganligi bilan asoslanadi.

Anjuman ishtirokchilari O'zbekiston Respublikasi Konstitutsiyasi shaxs, jamiyat va davlat o'rtasidagi o'zaro munosabatlarning demokratik tamoyillarini belgilab berganini ta'kidladilar. Bosh Qomusimizda fuqarolar hamda fuqarolik jamiyati institutlarining huquqlari va qonuniy manfaatlari to'liq kafolatlangandir.

Xalqaro anjumanda O'zbekiston Respublikasida inson huquq va erkinliklarining konstitutsiyaviy-huquqiy kafolatlarini yanada kuchaytirishga yo'naltirilgan xulosa va tavsiyalar ishlab chiqildi.

2018 yil 10 dekabr kuni «Inson huquq va erkinliklarining konstitutsiyaviy kafolatini mustahkamlash – O'zbekiston Respublikasidagi demokratik islohotlar yangi bosqichining muhim yo'nalishi» mavzusida xalqaro anjuman bo'lib o'tdi.