Bugun Samarqand shahrida “Inson huquqlari sohasida taʼlim” global forumning ikkinchi yalpi majlisida butun dunyoda inson huquqlari bilan shugʻullanuvchi yosh pedagoglarning ilgʻor tajribasini ommalashtirishga qaratilgan hujjat loyihasi muhokama qilindi.

Tadbirda qayd etilganidek, inson huquqlari boʻyicha taʼlim va tarbiya tizimini xalqaro, mintaqaviy va milliy darajalarda takomillashtirish zarur. Shu nuqtayi nazardan global forumning uchinchi yalpi majlisi bu boradagi ilgʻor tajribalar toʻgʻrisida axborotlar almashish va shu asosda amaliy tavsiyalar ishlab chiqishga bagʻishlandi.

Global forumning yakuniy hujjatini qabul qilish masalasi toʻrtinchi yalpi majlisda koʻrib chiqildi. Ishtirokchilarning taklif-tavsiyalari asosida 2023-2025-yillarga moʻljallangan “Inson huquqlari sohasida taʼlimni rivojlantirish boʻyicha Samarqand harakatlar rejasi” qabul qilindi.

Shundan soʻng global forumning yopilish marosimi boʻldi. Unda Oʻzbekiston Respublikasi Oliy Majlisi Qonunchilik palatasi Spikerining birinchi oʻrinbosari, Inson huquqlari boʻyicha Oʻzbekiston Respublikasi Milliy markazi direktori Akmal Saidov hamda BMTning Inson huquqlari boʻyicha Oliy komissari boshqarmasining Markaziy Osiyodagi mintaqaviy vakili vazifasini bajaruvchisi Fabio Piana soʻzga chiqib, ushbu sohada “Samarqand harakatlar rejasi”ning ahamiyatiga alohida toʻxtaldi.

Eʼtirofli jihati, “Inson huquqlari sohasida taʼlimni rivojlantirish boʻyicha Samarqand harakatlar rejasi”da inson huquqlari sohasidagi taʼlim va tarbiyani samarali amalga oshirish boʻyicha xalqaro hamjamiyat, milliy hukumatlar, oʻquv va ilmiy muassasalar hamda fuqarolik jamiyati institutlari oldida turgan vazifa, taklif va tavsiyalar oʻz ifodasini topdi.

Global forum yakunida ushbu vazifalarni izchil roʻyobga chiqarishga ishonch bildirildi. Zotan, inson huquqlari sohasidagi taʼlim-tarbiyani oilada, maktabgacha taʼlimda, maktab yoshida, oliy taʼlimda, sud va huquqni muhofaza qilish organlari kabi professional institutlar, fuqarolik jamiyati institutlari hamda ommaviy axborot vositalari orqali uzluksiz davom ettirish har bir davlat va jamiyat uchun hayotiy zaruratga aylandi.

Abdulaziz Yoʻldoshev, “Xalq soʻzi”