2022 yilning 5-6 dekabr kunlari Samarqand shahrida bo‘lib o‘tishi rejalashtirilgan "Inson huquqlari sohasida taʼlim" mavzusidagi Global forum bugun o‘z ishini boshladi. Ushbu nufuzli xalqaro anjumanni o‘tkazish tashabbusi O‘zbekiston Respublikasi Prezidenti tomonidan Birlashgan Millatlar Tashkiloti Bosh Assambleyasining 76-sessiyasi va BMT Inson huquqlari bo‘yicha kengashining 46-sessiyasida ilgari surilgan edi.

Global forumning Milliy tashkilotchisi – O‘zbekiston Respublikasi Hukumati nomidan Inson huquqlari bo‘yicha O‘zbekiston Respublikasi Milliy markazi hisoblanadi.

Samarqand Global forumi BMT Inson huquqlari bo‘yicha Oliy komissari Boshqarmasi; Inson huquqlari bo‘yicha Oliy komissarning Markaziy Osiyo bo‘yicha mintaqaviy byurosi; BMTning mamlakatimizdagi jamoasi; BMT Qochoqlar ishlari bo‘yicha oliy komissari Boshqarmasi; YUNISEF; Yevropada xavfsizlik va hamkorlik tashkiloti Demokratik institutlar va inson huquqlari bo‘yicha byurosi; YEXHTning O‘zbekistondagi Loyihalari muvofiqlashtiruvchisi ofisi; Yevropa Kengashi, Fridrix Ebert jamg‘armasi bilan hamjihatlikda tashkil etilmoqda.

Global forumda dunyoning turli davlatlaridan inson huquqlari sohasidagi taʼlim mutaxassislari, xorijiy va xalqaro ekspertlar, davlat organlari, xalqaro va mintaqaviy tashkilotlar, ixtisoslashtirilgan taʼlim muassasalari, nodavlat notijorat tashkilotlari hamda fuqarolik jamiyatining boshqa institutlari vakillari, yuqori lavozimli shaxslar – jami 120 dan ortiq xorijlik mehmon ishtirok etmoqda.

Samarqand Global forumining BMT shafeligida gibrid formatda o‘tkazilishi butun dunyodan yana-da keng auditoriyaga, soha mutaxassislariga virtual tarzda ishtirok etish va muhokama sessiyalarida qatnashish imkonini beradi.

Samarqand Global forumining ochilish marosimida O‘zbekiston Respublikasi Prezidenti Shavkat Mirziyoyevning murojaati o‘qib eshittirildi va Birlashgan Millatlar Tashkiloti Bosh kotibi Antoniu Guterrish hamda BMT Inson huquqlari bo‘yicha Oliy komissari Folker Tyurkning videomurojaatlari namoyish etildi.

Global forum ishida O‘zbekiston tomonidan – hukumat aʼzolari, Oliy Majlis palatalari va qo‘mitalari rahbarlari, vazirlik va tashkilotlar, o‘quv va ilmiy-maʼrifiy muassasalar, fuqarolik jamiyati institutlari vakillari qatnashmoqda.

Global forum Inson huquqlari sohasida taʼlim va tarbiya to‘g‘risidagi deklaratsiyaning 10 yilligiga bag‘ishlanadi. Mazkur Deklaratsiya 2011 yil dekabrida BMT Bosh Assambleyasi tomonidan qabul qilingan.

BMT Bosh Assambleyasi 2004 yil 10 dekabrda Inson huquqlari sohasidagi Jahon taʼlim dasturini ham eʼlon qilgan. BMTning Inson huquqlari bo‘yicha Oliy komissari Boshqarmasi Jahon taʼlim dasturi bajarilishining muvofiqlashtiruvchisi etib belgilangan.

Inson huquqlari sohasidagi Jahon taʼlim dasturi – doimiy amalga oshiriladigan uzluksiz bosqichlardan iborat tashabbusdir. O‘tgan davrda Jahon taʼlim dasturi inson huquqlari sohasidagi taʼlim bo‘yicha milliy saʼy-harakatlar uchta bosqichda bajarildi va 2024 yilga qadar davom etadigan to‘rtinchi bosqich izchillik bilan amalga oshirilmoqda. 

Samarqand Global forumining asosiy maqsadi – BMTning Inson huquqlari sohasida taʼlim va tarbiya to‘g‘risidagi deklaratsiyasi hamda BMTning Inson huquqlari sohasidagi taʼlim bo‘yicha Jahon taʼlim dasturi amalga oshirilishining oraliq natijalarini sarhisob qilishdan iborat.

Global forumning birinchi yalpi majlisi “BMTning Inson huquqlari sohasida taʼlim va tarbiya to‘g‘risidagi deklaratsiyasi: natijalar va zamonaviy muammolar” mavzusiga bag‘ishlanadi. Unda ushbu Deklaratsiyasini amalga oshirish, inson huquqlari bo‘yicha samarali taʼlimni taʼminlash tamoyillari va yondashuvlar, texnologik o‘zgarishlar negizida erishilgan yutuqlar va olingan saboqlar, dunyoning turli burchaklarida inson huquqlari bo‘yicha taʼlim sohasida mavjud zamonaviy muammolar muhokama qilinadi.

Global forumning birinchi kuni, shuningdek, 4 ta parallel sessiya tashkil etilmoqda.          

Birinchi sessiya: “Maktab yoshidagi bolalar uchun inson huquqlari sohasidagi taʼlim: tamoyillar, yondashuvlar va zamonaviy muammolar”;

Ikkinchi sessiya: “Oliy taʼlim muassasalarida inson huquqlari sohasidagi taʼlim: tamoyillar, yondashuvlar va zamonaviy muammolar (COVID-19, texnologiyalarni rivojlantirish, internet resurslari, geosiyosat va boshqalar)”;

Uchinchi sessiya: “Kasbiy institutlar (sudlar, huquqni muhofaza qilish organlari, advokatura) orqali inson huquqlari sohasida uzluksiz taʼlimni taʼminlash: tamoyillar, yondashuvlar va zamonaviy muammolar”;

To‘rtinchi sessiya: “Fuqarolik jamiyati uchun inson huquqlari bo‘yicha norasmiy taʼlim: tamoyillar, yondashuvlar va zamonaviy muammolar.

Shuningdek, "Inson huquqlari sohasida taʼlim" mavzusidagi Global forum ertaga ham davom etadi.

IIV Malaka oshirish instituti Matbuot xizmati