21-fevral kuni O‘zbekiston Respublikasi Oliy Majlisi Qonunchilik palatasi Kengashi va O‘zbekiston Respublikasi Oliy Majlisi Senati Kengashining “Bola huquqlari to‘g‘risidagi konvensiya qoidalarini amalga oshirish bo‘yicha O‘zbekistonning Beshinchi davriy ma’ruzasi yuzasidan BMTning Bola huquqlari bo‘yicha qo‘mitasi tavsiyalarini amaliyotga tatbiq etish to‘g‘risida”gi qo‘shma qarori qabul qilindi.

Mazkur hujjat BMT Bola huquqlari bo‘yicha qo‘mitasining Bola huquqlari to‘g‘risidagi konvensiya bajarilishi yuzasidan O‘zbekistonning Beshinchi davriy ma’ruzasini ko‘rib chiqish natijalari bo‘yicha yakuniy tavsiyalarini amalga oshirish maqsadida ishlab chiqildi. Qo‘shma qaror matni mutasaddi vazirlik va idoralar hamda nodavlat notijorat tashkilotlari vakillari bilan hamkorlikda tayyorlandi.

Oliy Majlis palatalari Kengashlarining Qo‘shma qarori bilan “BMTning Bola huquqlari to‘g‘risidagi konvensiyasi qoidalarini amalga oshirish bo‘yicha O‘zbekiston Respublikasining Beshinchi davriy ma’ruzasini ko‘rib chiqish yakunlari yuzasidan BMTning Bola huquqlari bo‘yicha qo‘mitasi tavsiyalarini amalga oshirish bo‘yicha 2024–2027-yillarga mo‘ljallangan milliy harakatlar rejasi” ham tasdiqlandi.

Milliy harakatlar rejasi 100 ta banddan iborat. Unda ilg‘or xorijiy tajribani o‘rganish, mavjud holatni tahlil qilish va sotsiologik tadqiqotlar o‘tkazish, milliy qonunchilik va huquqni qo‘llash amaliyotini takomillashtirish, tegishli institutlarni tashkil etish, ularning moddiy-texnika bazasini kuchaytirish, xodimlarning malakasini oshirish, aholi orasida tushuntirish ishlarini olib borish bo‘yicha chora-tadbirlar qamrab olingan.

Shuningdek, Milliy harakatlar rejasida BMT Bola huquqlari bo‘yicha qo‘mitasining har bir tavsiyasini bajarish bo‘yicha mexanizmlar, bajarish uchun mas’ullar va ijro muddatlari aniq belgilangan.

Inson huquqlari bo‘yicha

O‘zbekiston Respublikasi

Milliy markazining

matbuot xizmati