Oliy Majlis Senati a’zosi Gulnora Ma’rufova Qozog‘istonning Olmaota shahrida bo‘lib o‘tgan “Ayollar, tinchlik va xavfsizlik” submintaqaviy platformasi ishida ishtirok etdi.

Bilamizki, submintaqaviy platformaning maqsadi BMT Xavfsizlik Kengashining 1325-sonli rezolyusiyasini amalga oshirish bo‘yicha xalqaro majburiyatlar va milliy harakat rejalarining (MHP) ijro etilishi bo‘yicha axborot almashish, inson xavfsizligiga o‘sib borayotgan xavflarni, shu jumladan, gumanitar inqirozlar oqibatlarini bartaraf etish bo‘yicha umumiy yondashuvlarni aniqlashdan iborat.

Platforma asosiy manfaatdor tomonlarga mintaqadagi “Ayollar, tinchlik va xavfsizlik” kun tartibini amalga oshirishni tezlashtirish va ayollar ishtirokini rag‘batlantirish uchun qo‘shma harakatlar va yechimlarni ishlab chiqish uchun mintaqaviy ustuvorliklar, muammolar va transchegaraviy istiqbollar haqida fikr yuritish imkoniyatini berdi.

O‘zbekiston delegatsiyasi a’zolari yurtimizda xotin-qizlarning mamlakat ijtimoiy-siyosiy hayotidagi o‘rni va mavqeini yuksaltirish, gender tenglikni ta’minlash yuzasidan amalga oshirilayotgan ishlar xususida ma’lumotlar berishdi.

Xususan, xotin-qizlarning ijtimoiy-iqtisodiy va siyosiy-huquqiy faolligini oshirish, ularning jamoat va siyosiy tashkilotlar faoliyatidagi faolligini kengaytirish uchun barcha zarur shart-sharoit yaratilgani, 2030-yilgacha gender tengligiga erishish strategiyasi tasdiqlangani, barcha qabul qilinayotgan me’yoriy-huquqiy hujjatlarni majburiy gender-huquqiy ekspertizasi joriy etilgani alohida ta’kidlab o‘tildi.

O‘zbekiston Respublikasi
Oliy Majlisi Senatining
Axborot xizmati

“Dunyo” AA