2021 yil 25 iyun kuni Toshkent shahrida O'zbekiston Respublikasi Oliy Majlisi Senatining o'n oltinchi yalpi majlisi o'z ishini boshladi.

Videokonferentsaloqa tarzida o'tkazilgan majlisda Hukumat a'zolari, vazirlik va idoralar rahbarlari hamda ommaviy axborot vositalari vakillari ishtirok etdi.

Yalpi majlisni O'zbekiston Respublikasi Oliy Majlisi Senati Raisi Tanzila Narbaeva olib bordi.

Mazkur yalpi majlis ishi Senatning rasmiy veb-sayti va ijtimoiy tarmoqlardagi sahifalari hamda “O'zreport” telekanali orqali to'g'ridan-to'g'ri jonli efirda namoyish etildi.

Oliy Majlis Senatining o'n beshinchi yalpi majlisida Namangan viloyatidan senator Anna Dobrix tomonidan to'qimachilik sanoatida faoliyat ko'rsatayotgan tadbirkorlar faoliyatida mahsulotlarni sertifikatsiya qilishda qator muammolar tug'dirgan Vazirlar Mahkamasining “O'zbekiston Respublikasida muvofiqligi tasdiqlanishi lozim bo'lgan muvofiqlikni baholash ob'ektlari ro'yxatlarini tasdiqlash to'g'risida”gi qarori ijrosi ko'tarilgan edi.

Ushbu masala Senatning Byudjet va iqtisodiy islohotlar masalalari qo'mitasi tomonidan o'rganildi. Majlisda mazkur o'rganish natijalari haqida Qo'mita raisi E. Gadoev ma'lumot berdi.

O'rganish natijasiga ko'ra, asosiy muammo­ ishlab chiqarish uchun zarur hisoblangan mahsulotlar (mato, ip-gazlama, furnitura va boshqa xom-ashyolar)ning respublikaga kirib kelishida, bojxona rasmiylashtiruv jarayonida, Vazirlar Mahkamasining 2021 yil 30 yanvardagi qaroriga muvofiq bojxona brokerlari tomonidan muvofiqlik sertifikatlari taqdim etilishi talab qilinayotganligi ma'lum bo'ldi.

Bundan tashqari, ishlab chiqaruvchilar hamda aholini qiynab kelayotgan boshqa tizimli muammolar ham aniqlangan. Xususan, yuridik va jismoniy shaxslar qayta ishlash bo'yicha xom-ashyo hamda xavfsizlik darajasi yuqori bo'lmagan gumanitar yordam va texnik ko'mak mahsulotlarini import qilganlarida ham muvofiqlik sertifikatlari talab etilmoqda.

Bu holatlar esa korxonalarning ishlab chiqarish jarayonlariga salbiy ta'sir o'tkazib, qo'shimcha mablag'lar sarflanishiga, chet ellik xaridorlar oldidagi majburiyatlarni o'z muddatida bajarilmayotganligiga hamda tadbirkorlar noroziligiga sabab bo'lmoqda.

Bu borada xorijiy davlatlar tajribasi o'rganilganda o'z ishlab chiqarish ehtiyojlari uchun olib kiriladigan mahsulotlarga muvofiqlikni baholash talab etilmasligi, balki mahsulotlar ichki bozorga muomalaga chiqarilayotgan paytda zarurligi ma'lum bo'lgan.

Shu munosabat bilan hamda tadbirkorlik faoliyati rivojiga xalal berayotgan byurokratik to'siqlarni bartaraf etish maqsadida Tashqi savdo, investitsiyalar, mahalliy sanoatni rivojlantirish va texnik jihatdan tartibga solish masalalari bo'yicha Hukumat komissiyasiga o'z ishlab chiqarish ehtiyojlari uchun foydalaniladigan, shuningdek, qayta ishlash (tolling) hamda gumanitar yordam va texnik ko'mak maqsadida import qilinadigan mahsulotlarga nisbatan muvofiqlik sertifikatini olishni tatbiq etmaslik taklifi kiritilgan.

Senatning Qo'mitasi raisi E. Gadoev O'zbekiston Respublikasi Prezidentining 2021 yil 2 iyundagi “Texnik jihatdan tartibga solish sohasida davlat boshqaruvini tubdan takomillashtirish to'g'risida”gi Farmoniga asosan mahsulotlar importida soddalashtirilgan bojxona rasmiylashtiruvini joriy qilish hamda 2021 yilda sifat milliy infratuzilmasini rivojlantirish bo'yicha “Yo'l xaritasi”da qator vazifalar belgilanganligi bois yuqoridagi muammolar hal etilishini ta'kidladi.

Senatorlar tomonidan O'zbekiston Respublikasi Oliy Majlisi Senatining davlat organlarida ochiqlik va oshkoralikni ta'minlash sohasidagi faoliyatini takomillashtirish to'g'risidagi masala ko'rib chiqildi.

Ta'kidlanganidek, Harakatlar strategiyasida davlat hokimiyati va boshqaruvi organlari faoliyatining ochiqligini ta'minlash, jismoniy va yuridik shaxslarning huquq va erkinliklari hamda qonuniy manfaatlariga oid axborotni taqdim qilishning zamonaviy shakllarini joriy etish davlat boshqaruvi tizimini isloh qilishning muhim yo'nalishi etib belgilandi.

Qisqa davr mobaynida bu borada salmoqli ishlar amalga oshirildi va ko'plab ijobiy natijalarga erishildi. Xususan, Hukumat portali doirasida jismoniy va yuridik shaxslarning axborotdan erkin va bepul foydalanish imkonini beruvchi O'zbekiston Respublikasining Ochiq ma'lumotlar portali faoliyati yo'lga qo'yildi. Qolaversa, “Mening fikrim”, “Ochiq byudjet”, “Davlat xaridlari”, “Shaffof qurilish” portallari kabi o'nlab elektron platformalar ishga tushirildi. Barcha darajadagi davlat va jamoat tashkilotlarining doimiy yangilanib turadigan rasmiy veb-saytlari yaratildi.

Majlisda senatorlar tomonidan mamlakatimizdagi o'zgarish va yangilanish jarayonlari, olib borilayotgan keng ko'lamli islohotlar mazmun-mohiyatini xalqimizga to'g'ri va to'liq tushuntirish, milliy axborot makonini xolis va asosli ma'lumotlar bilan to'yintirish zarurati axborot siyosati hamda ochiqlikni ta'minlash borasidagi sa'y-harakatlar, tizimli nazorat, jumladan, parlament nazorati muhim ahamiyat kasb etishi ta'kidlandi.

Majlisda O'zbekiston Respublikasi Oliy Majlisi Senatining Axborot siyosati va davlat organlarida ochiqlikni ta'minlash masalalari qo'mitasini tashkil etish to'g'risidagi masala ko'rib chiqildi. Qolaversa, mazkur qo'mitaning vazifalariga e'tibor qaratildi.

Qo'mita davlat organlari va tashkilotlari faoliyatining ochiqligini ta'minlash sohasini muvofiqlashtirib boradi va bu borada doimiy nazoratni amalga oshiradi.

Majlisda senator Farxod Esanovich Boqiev mazkur Qo'mita raisining o'rinbosari etib saylandi.

Mazkur masala yuzasidan Oliy Majlis Senatining tegishli qarori qabul qilindi.

Yalpi majlisda mahallalardagi holat, ayollarning huquq va manfaatlarini himoya qilish, tadbirkorlikni qo'llab-quvvatlash, aholi bandligini ta'minlash masalalari muhokama qilindi.

Qayd etilganidek, Prezidentimiz tomonidan ilgari surilgan “mahallabay” va “fuqarobay” ish uslublari ayni damda aholi murojaatlari va jamiyatdagi ko'plab muammolarni bartaraf etishda o'z samarasini ko'rsatmoqda. Joylardagi muammolarni “mahallabay” aniqlash va bartaraf etish, xususan, hududlarda “Obod qishloq” va “Obod mahalla” dasturlari ijrosini ta'minlash maqsadida keng ko'lamli ishlar amalga oshirilmoqda.

Xususan, mamlakatimizda qarorlar qabul qilish va ijro etishning barcha sohalarida hamda darajalarida xotin-qizlar va erkaklar o'rtasida tenglik tamoyilini tatbiq etish, erkaklar va ayollarning teng huquqlari va imkoniyatlarini ro'yobga chiqarish uchun shart-sharoitlar yaratish hamda iqtisodiy, siyosiy va ijtimoiy hayotda gender tenglik targ'ib qilinishini ta'minlash maqsadida O'zbekistonda 2030 yilga qadar gender tenglikka erishish strategiyasi qabul qilindi.

Yana bir jihat. O'tgan davr mobaynida mehnat organlari tomonidan 308,8 ming nafar ayollarga bandlik va mehnat sohasidagi xizmatlar ko'rsatildi. Yoshlar va xotin-qizlarni kasb-hunar va tadbirkorlikka o'qitish dasturlarini samarali amalga oshirish hamda ularning tadbirkorlik faoliyati uchun mikrokreditlar ajratish tizimi takomillashtirildi.

Majlisda Xotin-qizlar muammolarini tizimli ravishda hal etish, ularni ijtimoiy qo'llab-quvvatlash bo'yicha respublika komissiyasi raisi Q.Rafiqovning axboroti eshitildi.

Ta'kidlanganidek, joriy yilning yanvar-may oylarida “Ayollar daftari”ga kiritilgan xotin-qizlardan 430 275 nafariga (99,4 foiz) amaliy yordamlar ko'rsatildi. Jumladan, 251 363 nafar ijtimoiy himoyaga muhtoj ishsiz xotin-qizlarning doimiy daromad manbaiga ega bo'lishiga ko'maklashildi.

Tadbirkorlik qilish istagini bildirgan 66 660 nafar xotin-qizning tadbirkorlik ko'nikmalari oshirildi va ularga 830 mlrd 37 mln so'mlik kreditlar ajratildi.

Noturar joylarda istiqomat qilayotgan, o'zining yoki birgalikda yashovchi oila a'zolarining nomida turar joy mavjud bo'lmagan xotin-qizlardan 4 065 nafariga 8 mlrd 635 mln so'mlik ijara kompensatsiyasi to'lab berildi, 4 769 nafari imtiyozli arzon uy-joylar bilan ta'minlandi.

“Ayollar daftari” jamg'armasi, “Saxovat va ko'mak” jamg'armasi, shuningdek, homiylik va boshqa manbalar hisobidan 36 697 nafar boquvchisini yo'qotgan ehtiyojmand xotin-qizlarga 27 mlrd 572 mln so'm, 29 040 nafar nogironligi bo'lgan va o'zgalar parvarishiga muhtoj xotin-qizlarga 21 mlrd 58 mln so'm, 8 103 nafar qaramog'ida nogironligi bo'lgan bolasi mavjud yolg'iz ayollarga 6 mlrd 959 mln so'm miqdorida moddiy yordam ko'rsatildi.

Onkologik kasalliklarni kamaytirish maqsadida 300 893 nafar xotin-qizda odam papillomasi virusiga qarshi emlash ishlari olib borildi. 4 mln 13 ming nafar tug'ish yoshidagi ayollar chuqurlashtirilgan tibbiy ko'rikdan o'tkazildi.

Qolaversa, “Ayollar daftari”ga kiritilgan xotin-qizlar uchun “Ayoli e'zozlangan yurt” shiori ostida mamlakatimiz bo'ylab sayohatlar tashkil etish yo'lga qo'yildi.

“Ayollar daftari”ga kiritilgan xotin-qizlarga ko'rsatilgan tegishli amaliy yordamlar va ularning muammolarini hal qilish natijasida bugungi kunga qadar 357 998 nafar xotin-qiz xalq deputatlari tuman va shahar kengashlarining sessiyalari qarorlari asosida “Ayollar daftari” ro'yxatidan chiqarildi.

Majlisda amalga oshirilgan ishlar bilan birga, ijtimoiy-iqtisodiy muammolarni bartaraf etish bo'yicha yo'l qo'yilgan ayrim kamchiliklar tanqidiy muhokama qilindi.

Qayd etilganidek, aholini ijtimoiy qo'llab-quvvatlash masalalariga barcha hududlarda ham birdek mas'uliyat bilan yondashilmayapti. Mavjud imkoniyatlardan samarali foydalanishda sustkashlikka yo'l qo'yish holatlari ham uchramoqda. Bu borada vazirlik va idoralarning vertikal tizimi samarali ishlashi, o'zaro mutasaddi idora, tashkilotlar o'rtasida o'zaro hamkorlikni kuchaytirish ta'kidlandi.

Bundan tashqari, mahalliy Kengashlar “Temir daftar”, “Yoshlar daftari”, “Ayollar daftari” bilan ishlash borasida kamchiliklarga yo'l qo'yilganligi qayd etildi.

Qolaversa, yaratilgan imkoniyatlar va imtiyozlardan aholining, ayniqsa, ijtimoiy himoyaga muhtoj aholi qatlami, shu jumladan, xotin-qizlar xabardorligi yetarli darajada emasligi, ushbu yo'nalishdagi ishlarga ham alohida e'tibor qaratish lozimligi belgilandi.

Senatorlar tomonidan jamiyatda xotin-qizlarning ijtimoiy-siyosiy, iqtisodiy faolligini oshirish, ularning huquq va manfaatlarini himoya qilish, tadbirkorlikni qo'llab-quvvatlash, bandligini ta'minlash, oila munosabatlarini yanada yaxshilashga qaratilgan tadbirlarni yanada kuchaytirish borasida fikr-mulohazalar bildirildi.

Mazkur masala yuzasidan Oliy Majlis Senatining tegishli qarori qabul qilindi.

Yalpi majlisda Senat a'zolari Toshkent viloyatining Oqqo'rg'on, Ohangaron, Bekobod, Bo'stonliq, Bo'ka, Zangiota, Yuqori Chirchiq, Qibray, Parkent, Piskent, O'rta Chirchiq, Yangiyo'l tumanlari va Olmaliq, Chirchiq, Angren,

Yangiyo'l, Bekobod shaharlari chegaralarini o'zgartirish to'g'risidagi masalani muhokama qildi.

Qayd etilganidek, bugungi kunda Toshkent viloyatining bir qancha tuman va shaharlari, jumladan, viloyatning Angren va Bekobod shaharlari hamda Qibray va Piskent tumanlari boshqa tuman va shaharlarda joylashgan “anklav” hududlarga ega. Bu holatlar jinoyatchilik va huquqbuzarliklarga qarshi kurashning samarali tashkil etilishi, aholining ijtimoiy ta'minoti va davlat organlari bilan o'zaro munosabatlarini amalga oshirishi, voyaga yetmaganlarning ta'lim jarayonini nazorat qilish hamda ularni tuman (shahar) darajasidagi ommaviy tadbirlarga jalb qilish va boshqa jarayonlarda muammolarning yuzaga kelishiga sabab bo'lmoqda.

Birgina misol, Bekobod tumanida joylashgan Istiqbol mahallasi fuqarolari, Bekobod shahar Yangi hayot mahalla hududida joylashgan maktabda ta'lim olishadi, davolanish uchun Bekobod shahrida joylashgan markaziy shifoxonaga borishadi, shuningdek, barcha kommunal yo'nalishdagi xizmatlarni shahar tashkilotlari ko'rsatadi.

Bundan tashqari, Angren shahridagi “Krasnogorsk” qo'rg'onida fuqarolariga kommunal xizmat ko'rsatish, xususan, elektr ta'minoti, ichimlik suvi, gaz ta'minoti hamda bank xizmatlari Parkent tumani tomonidan amalga oshiriladi. “Krasnogorsk” qo'rg'oni fuqarolari davolanish uchun ham Parkent tumanida joylashgan markaziy shifoxonaga qatnaydi.

Bu esa ushbu hududlar aholisi hayotida turli qiyinchiliklarning kelib chiqishiga sabab bo'lmoqda.

Shu sababli, O'zbekiston Respublikasi Konstitutsiyasi hamda “O'zbekiston Respublikasining ma'muriy-hududiy tuzilishi to'g'risida”gi O'zbekiston Respublikasining Qonuniga asosan Toshkent viloyatining yuqorida qayd etilgan tuman va shaharlari chegaralarini o'zgartirish taklifi ilgari surilmoqda. Jami o'zgartirilayotgan tuman va shaharlar chegaralarining yer maydoni 17 359,1 gektar bo'lib, shundan 10 084,8 gektari qishloq xo'jaligi yerlaridir.

Natijada Toshkent viloyati ma'muriy-hududiy birliklar chegaralarini tartibga solish anklav hududlarni tugatish hamda mahalliy davlat hokimliklari organlari tomonidan hudud boshqaruvini yanada soddalashtirishga, qolaversa, ma'muriy-hududiy birliklarining ijtimoiy-iqtisodiy rivojlantirilishiga olib keladi.

Shuningdek, Toshkent viloyati shaharlarini 2021–2030 yillarda rivojlantirish uchun zarur bo'lgan hududlarni belgilash, ushbu davrda investitsiya loyihalarini amalga oshirish, yangi turar-joy massivlarini barpo etish orqali shaharlarning o'sib borayotgan aholisi ehtiyojlarini qanoatlantirishga xizmat qiladi.

Mazkur masala yuzasidan Oliy Majlis Senatining tegishli qarori qabul qilindi.

Shundan so'ng xalq deputatlari Qarshi tumani Kengashining 2020 yil 16 apreldagi “Tumanda dehqon va fermer xo'jaliklari tomonidan yer uchastkalaridan samarali foydalanish, qishloq xo'jaligi mahsulotlari ishlab chiqarishni yanada ko'paytirish, fermerlarning moliyaviy holatini yanada yaxshilash maqsadida amalga oshirilayotgan ishlar to'g'risida”gi 34/06-06-sonli qarorini o'rganish natijalari muhokama qilindi.

Aniqlanishicha, Qarshi tumani hokimining 2019 yil 13 fevraldagi X-1749/02-sonli qaroriga asosan fermer xo'jaligini tashkil etish uchun fuqaro D.Elmurodovga 10,1 gektar yer maydoni 49 yilga ijaraga ajratib berilgan. Biroq xalq deputatlari Qarshi tumani Kengashining 2020 yil 16 apreldagi 34/06-06-sonli qarori amaldagi bir qator qonunchilik hujjatlariga zid ravishda qabul qilingan.

Jumladan, xalq deputatlari Qarshi tumani Kengashining 2020 yil 16 apreldagi 34/06-06-sonli qarori bilan Elmurodov Dilshod (“Bog'i obod agro” fermer xo'jaligi) va yana 16 nafar dehqon va fermer xo'jaliklari bilan tuzilgan yer ijara shartnomasi noqonuniy ravishda bekor qilingan.

Vaholanki, Fuqarolik kodeksining 382-moddasiga muvofiq shartnoma taraflarning kelishuviga muvofiq o'zgartirilishi va bekor qilinishi mumkin.

Qolaversa, Yer kodeksining 24-moddasi hamda “Fermer xo'jaligi to'g'risida”gi Qonunning 13-moddasiga ko'ra yer uchastkalarini ijaraga olish shartnomasini muddatidan oldin bekor qilish taraflarning kelishuvi bilan, bunday kelishuvga erishilmagan taqdirda esa sudning hal qiluv qarori bilan amalga oshiriladi.

Bundan tashqari, “Ma'muriy tartib-taomillar to'g'risida”gi Qonunning 9-moddasida ma'muriy organ manfaatdor shaxsga ma'muriy hujjatni qabul qilish uchun ahamiyatga ega bo'lgan barcha holatlar yuzasidan o'z fikrini bildirish imkoniyatini berishi shartligi belgilangan bo'lsa-da, qaror qabul qilishda dehqon va fermer xo'jaligi rahbarlarining ishtiroki ta'minlanmagan va unga holat bo'yicha o'z fikrlarini bildirish imkoniyati berilmagan.

Mazkur Qonunning 19-moddasiga muvofiq ma'muriy tartib-taomillar printsiplariga nomuvofiqlik ma'muriy hujjatlarning va ma'muriy harakatlarning bekor qilinishiga yoki qayta ko'rib chiqilishiga olib keladi.

Shu jihatdan xalq deputatlari Qarshi tuman Kengashining mazkur qarorini bekor qilish to'g'risida Oliy Majlisi Senatining tegishli qarori qabul qilindi.

Senatorlar qon va uning tarkibiy qismlari donorligi sohasini rivojlantirish uchun ko'rilayotgan choralar to'g'risida O'zbekiston Respublikasi Vazirlar Mahkamasiga parlament so'rovini yuborish haqidagi masalani ko'rib chiqdi.

Ta'kidlanganidek, Senatning Fan, ta'lim va sog'liqni saqlash masalalari qo'mitasi tomonidan hududlarda qon va uning tarkibiy qismlari donorligiga oid qonun hujjatlarining ijro etilishi holati muhokama qilindi.

Bugungi kunda, sog'liqni saqlash tizimidagi qon quyish xizmati Respublika qon quyish markazi, Toshkent shahar “Qon preparatlari” ilmiy ishlab-chiqarish korxonasi, Qoraqalpog'iston Respublikasi qon quyish stantsiyasi va 12 ta viloyatlar qon quyish stantsiyasi, 2 ta respublika tasarrufidagi qon quyish stantsiyasi muassasalari hamda 196 ta qon quyish bo'limlari (qon banklari)dan iborat.

Respublika qon quyish markazi tomonidan qon preparatlari ishlab chiqarish bo'limi uchun byudjetdan tashqari mablag'lar hisobidan besh yuz milliard so'mliklikdan ortiq zarur jihozlar sotib olinib, o'rnatilgan.

Bugungi kunda jahon hamjamiyatini tashvishga solayotgan pandemiya sharoitida mamlakatimizda qon ishlab chiqish, qon zaxirasini shakllantirish amaliyoti talab darajasida yo'lga qo'yish eng muhim vazifalaridan ekanligi alohida e'tirof etildi.

Majlisda mamlakatimizda sog'lom turmush tarzini targ'ib qilish, qon va uning tarkibiy qismlari donorligi sohasida davlat siyosatini takomillashtirish maqsadida qon va uning tarkibiy qismlarini rivojlantirish bo'yicha Kontseptsiya ishlab chiqish, qon quyish muassasalari moddiy-texnik holatini yaxshilash, sohaga axborot-texnologiyalarni joriy etish, donorlar va qon zaxirasi haqidagi ma'lumotlar almashinuvi uchun raqamlashtirishni yo'lga qo'yish, respublika hudularida mobil` brigadalar tomonidan qon zaxirasini oshirishga ustuvor ahamiyat qaratish, qon quyish muassasalarini ko'chma donorlik komplekslari bilan ta'minlash muhimligi qayd etildi.

Shu bilan birga, qon quyish markazlarida qon komponentlarini tayyorlovchi asbob-uskunalarni davriy ravishda ko'rikdan o'tkazib, uzviy ta'mirlovchi mutaxassislar tayyorlashni yo'lga qo'yish, ko'ngilli va beg'araz donorlikni targ'ibot qilish bo'yicha faollar (volontyorlar) harakatini rivojlantirish, qon va uning tarkibiy qismlari donorligidan xavfsiz va samarali foydalanish maqsadida zamonaviy ilg'or texnologiyalarni joriy etish, bunda donor qonini gemotransmissiv infektsiyalarga (OIV, gepatit V, S) zamonaviy usullarda (PTSR apparati orqali) tekshirishni yo'lga qo'yish masalalariga urg'u berildi.

Mazkur masala yuzasidan Oliy Majlis Senatining tegishli qarori qabul qilindi.

Shundan so'ng oqova suv tozalash inshootlarida vujudga kelayotgan muammo va kamchiliklarning atrof-muhit hamda aholi salomatligiga ta'siri to'g'risida O'zbekiston Respublikasi Vazirlar Mahkamasiga parlament so'rovi yuborish haqidagi masala ko'rib chiqildi.

Oqova suv tozalash inshootlarining ishlashi joylarda o'rganilib, mamlakatimizning 5,6 mln (17 foiz) aholisi oqova suv xizmati bilan ta'minlanganligi, shuningdek, bugungi kunda hududlardagi jami 58 ta yirik oqova suv tozalash inshootlarining 49 tasi (84 foiz), 8,6 ming km oqova suv tarmoqlarining 1,9 ming km (22 foiz) qismi ta'mirtalab holatda ekanligi ta'kidlandi.

Ushbu inshootlar uch bosqichda: mexanik, biologik va kimyoviy tozalash funktsiyasini bajarishga ixtisoslashgan bo'lib, aksariyat inshootlarda faqat mexanik tozalash ishlari bajarilmoqda.

Bundan tashqari, Toshkent shahrining Salar, Bo'zsuv, Bektemir hamda Surxondaryo viloyatining Termiz shahri oqova suv tozalash inshootlari bugungi kunda ta'mirtalab holatga kelib qolgani aniqlangan.

Shu bilan birga, mahalliy oqova suv tozalash inshootlari talabga javob bermasdan kanalizatsiya tarmoqlariga oqovalarning me'yor darajasida tozalanmasdan tashlab yuborilayotganligi ma'lum bo'lgan.

Respublikamizning barcha viloyatlarida oqova suv tozalash inshootlari ta'mirtalab, malakali kadrlar yetishmasligi va mavjud jihozlarning eskirganligi sababli to'liq foydalanilmasdan oqova suvlar zararsizlantirilmasdan inshootga yaqin bo'lgan daryolar va soylarga oqizib yuborilmoqda.

Ushbu masala yuzasidan Oliy Majlis Senatining tegishli qarori qabul qilindi.

So'ngra 2030 yilgacha bo'lgan davrda barqaror rivojlanish sohasidagi milliy maqsad va vazifalarda nazarda tutilgan infratuzilmani yaratish, sanoatlashuv va innovatsiyalarga ko'maklashish maqsadiga erishish bo'yicha amalga oshirilayotgan ishlar yuzasidan O'zbekiston Respublikasi Vazirlar Mahkamasiga yuborilgan parlament so'rovi natijalari muhokama qilindi.

Qayd etilganidek, mazkur yo'nalishda muayyan ishlar amalga oshirilgan. Xususan, Davlat ishtirokidagi korxonalar faoliyatini bozor mexanizmlari asosida boshqarishni yanada jadallashtirish maqsadida O'zbekiston Respublikasi Prezidentining 2020 yil 27 oktyabrdagi 6096-sonli Farmoni qabul qilinib, unga ko'ra bugungi kunga qadar 541 ta davlat ulushi mavjud korxonaning 247 tasi 2,3 trln so'm qiymatda savdoga chiqarilib, 96 tasi 411,6 mlrd so'mga sotilgan.

Davlat geologiya qo'mitasi tasarrufidagi 6 ta yirik davlat korxonalari aktsiyadorlik jamiyatlari sifatida qayta tashkil etilib, ularning kuzatuv kengashlariga 6 nafar chet ellik malakali ekspertlar mustaqil a'zo sifatida jalb etilgan.

Geologik izlanishlar yo'nalishida 400 mln dollarlik kredit shartnomalari rasmiylashtirilib, xalqaro banklar bilan 900 mln dollarlik sindikatlangan kredit ajratish to'g'risida bitimlar tuzilgan.

Bo'sh turgan va foydalanilmayotgan ishlab chiqarish quvvatlarini (ob'ektlar) ishlab chiqarishga jalb qilish yuzasidan o'tkazilgan xatlovlar natijasida 27 675 ta ob'ekt aniqlanib, 1 215 ta ob'ekt bo'sh turganlar toifasidan chiqarilib, 1 146 ta ob'ektdan kelgusida samarali foydalanish belgilanib, 744 ta yangi ob'ektdan samarali foydalanish choralari ko'rilgan.

Yoqilg'i-energetika va tog'-kon metallurgiya sanoatlari korxonalarida resurs va energiya tejovchi texnologiyalarni joriy etish darajasini oshirish, texnologik yuqotishlarni kamaytirish yuzasidan O'zbekiston Respublikasi Prezidentining 2020 yil 10 iyuldagi 4779-sonli qarori bilan yoqilg'i-energetika resurslarini tejash bo'yicha “Yo'l xaritasi” tasdiqlanib, chora-tadbirlar belgilab olingan.

O'zbekiston Respublikasi Prezidentining 2016 yil 22 dekabrdagi 2692-sonli qarori bilan 2017-2021 yillarda sanoat tarmog'i korxonalari uchun ishlab chiqarish xarajatlarini qisqartirishning maqsadli parametrlari tasdiqlangan.

Iste'molchilarni uzluksiz elektr energiyasi bilan ta'minlash maqsadida tizimli ishlar yo'lga qo'yilib o'tgan davr ichida respublika hududida 25 ming km elektr uzatish tarmoqlari hamda 8 ming tadan ortiq transformator punktlari yangilangan, rekonstruktsiya kilingani natijasida 1,7 milliondan ortiq aholi xonadonlarida elektr ta'minoti yaxshilangan.

Iqtisodiyot tarmoqlarning texnologik salohiyatini oshirishga qaratilgan ilmiy-tadqiqotlar sonini oshirish, innovatsion faoliyat uchun qulay shart-sharoitlar yaratish maqsadida Fanlar akademiyasining tegishli yo'nalishdagi ilmiy tashkilotlari ilmiy ishlanmalarini tijoratlashtirish bo'yicha “Yo'l xarita”si ishlab chiqilgan.

Sanoatda ishlab chiqarishni diversifikatsiyalash va xomashyo sohalarida qayta ishlashni ko'paytirish, innovatsiyalar va ishlanmalarni jalb qilishni qo'llab-quvvatlash bo'yicha ko'rilayotgan choralar natijasida 2010-2020 yillarda sanoatdagi yalpi ko'shilgan kiymatning o'rtacha yillik o'sish sur'ati 105,5 foizni, iqtisodiyot tarmoqlari bo'yicha 106,3 foizni tashkil etgan.

Sanoatni raqamlashtirish, modernizatsiya va diversifikatsiya qilishni jadallashtirish, xususiy sektorni rivojlantirish uchun sharoitlar yaratish, sanoatda bozor mexanizmlarini keng joriy etish, ilmiy yutuklardan samarali foydalanish maqsadida 2030 yilgacha sanoatini rivojlantirish strategiyasi ishlab chiqilgan.

Axborot-kommunikatsiya texnologiyalarini rivojlantirish va iqtisodiyotni raqamlashtirish ko'lamini kengaytirish bo'yicha telekommunikatsiya infratuzilmasini rivojlantirish uchun sohada yirik investitsiya loyihalari amalga oshirilishi ta'minlangan.

Optik tolali aloqa liniyalarining uzunligi 81 ming kmni tashkil etib joriy yil yakuniga qadar 118,6 ming kmga yetkazish rejalashtirilgan.

Bugungi kunga qadar 1,7 mln ta keng polosali internet tarmog'iga ulanish portlari o'rnatilib ularning umumiy sonini 2021 yil oxiriga qadar 3,9 mln taga yetkazilishi rejalashtirilgan.

Ijtimoiy soha ob'ektlarini yuqori tezlikdagi internet bilan ta'minlash doirasida 9 347 ta xalq ta'limi, 5 625 ta maktabgacha ta'lim muassasalari va 3 401 ta sog'liqni saqlash ob'ektlarining yuqori tezlikdagi internet tarmog'iga ulanish imkoniyati yaratilgan.

Bundan tashqari, operator va provayderlarga internet xizmatlari uchun mavjud texnik quvvatlarni keskin oshirish hisobiga 2019 yilning shu davriga nisbatan aloqa kanallari ijarasi tariflari 2 barobarga, 2020 yil davomida internet xizmati tariflari 29 foizga arzonlashtirildi.

Ushbu masala yuzasidan Oliy Majlis Senatining tegishli qarori qabul qilindi.

Yalpi majlisda senatorlar tomonidan O'zbekiston Respublikasi Prezidentining 2021 yil 2 iyundagi “Texnik jihatdan tartibga solish sohasida davlat boshqaruvini tubdan takomillashtirish to'g'risida”gi PF–6240-sonli Farmonini tasdiqlash to'g'risida qaror qabul qilindi.

Qolaversa, O'zbekiston Respublikasi Markaziy saylov komissiyasining tarkibiga o'zgartish kiritish hamda O'zbekiston Respublikasi Oliy sudi tarkibiga o'zgartirishlar kiritish to'g'risida qarorlar qabul qilindi.

Shuning bilan O'zbekiston Respublikasi Oliy Majlisi Senatining o'n oltinchi yalpi majlisining birinchi ish kuni yakunlandi.

Manba: senat.uz