Muhammad Rizo Majidiy, Osiyo Parlament assambleyasi bosh kotibi:

– Inson huquqlari boʻyicha Osiyo forumi va uning doirasidagi uchrashuvlar muhim ahamiyatga ega. Bunday muloqot Barqaror rivojlanish maqsadlariga erishishni toʻlaqonli taʼminlashda oʻzaro fikr almashish uchun ajoyib imkoniyatdir.

Inson huquqlari, demokratiya va qonun ustuvorligini ilgari surishda parlament instituti muhim rol oʻynaydi. Zero, parlamentda fuqarolar manfaatini ifoda etish, qonunchilikka rioya qilinishini taʼminlash borasidagi imkoniyat yuqori.

Osiyo Parlament assambleyasi ham tashkilotga aʼzo mamlakatlarda tinchlikka erishish yoʻlida strategiyalar ishlab chiqish va targʻib qilishga intilib, demokratik mezonlarni mustahkamlashdagi hamkorlik uchun mustahkam poydevor yaratib kelmoqda.

Inson huquqlarini taʼminlash uzoq muddatli istiqbolga ega integratsiyalashuv sohasidagi sheriklikni kengaytirishni taqozo etadi. Ayni shu oʻrinda Samarqand forumining qanchalik ahamiyatga ega ekani maʼlum boʻladi. Ushbu forum mintaqadagi voqealarga taʼsir koʻrsata oladigan, insoniyat uchun tinchlik, farovonlik va taraqqiyotni kafolatlash yoʻlidagi harakatlarni birlashtiradigan muhim anjuman boʻldi.

Margareta Kiner Nellen, YEXHT Parlament assambleyasining Demokratiya, inson huquqlari va gumanitar masalalar boʻyicha bosh qoʻmitasi raisi:

– Anjumanda YEXHT Parlament assambleyasi nomidan ishtirok etganimdan mamnunman. Forumni tashkil qilishda bevosita tashabbus koʻrsatgan Oʻzbekiston rahbariyati va Inson huquqlari boʻyicha Oʻzbekiston Respublikasi Milliy markaziga oʻz minnatdorligimni bildiraman.

Inson huquqlarini taʼminlashdagi maqsadlarga erishish uchun milliy, mintaqaviy va global miqyosdagi harakatlar birgalikda amalga oshirilishi kerak. Inson huquqlari boʻyicha Osiyo forumi ana shunday hamkorlikka, milliy va mintaqaviy qarashlarni umumlashtirish yoʻlidagi samarali muloqotga imkon yaratdi.

Vyacheslav Tolmachev, Rossiya Federatsiyasining Inson huquqlari boʻyicha vakili maslahatchisi:

– Hozirgi iqtisodiy taraqqiyot va globallashuv sharoitida inson huquqlarini taʼminlash masalasi siyosiy ahamiyat kasb etmoqda. Bizning vazifamiz inson huquqlarini mustahkamlashning siyosiylashuv mezonidan bosqichma-bosqich voz kechishga erishishdir. Biroq, hozir inson manfaati borasida dunyoda yakdil qarash va meʼyorlar yoʻq.

Inson huquqlari boʻyicha institutlar va markazlar ana shunday maqsadlarga erishishdagi ijtimoiy yoʻlak hisoblanadi. Shu bois, oʻzaro muloqot va maslahatlashuvlarga ehtiyoj bor.

Samarqandda oʻtkazilgan forum yuqori saviyada, keng qamrovli yoʻnalishlarda tashkil qilingani bilan ahamiyatli. Unda bugungi qator muammolar yuzasidan fikr almashish, yechim ishlab chiqish boʻyicha ishtirokchilarning oʻzaro muloqotlari tashkil qilindi.

Zulfiya Kochorbayeva, “Ijtimoiy texnologiyalar” agentligi direktori (Qirgʻiziston):

– Faoliyatimiz xotin-qizlar huquqlarini himoya qilishga qaratilgan. Bugungi kunda xotin-qizlarga nisbatan oila va jamiyatda zoʻravonlik holatlari koʻpaygan. Bu muammoni global xarakterga ega, deyish uchun asoslar mavjud. Har uchinchi xotin-qiz bir bor boʻlsa-da, zoʻravonlik holatlariga duch keladi. Qirgʻizistonda bu boradagi raqamlar yuqoridagi koʻrsatkichlarga mos.

Inson huquqlari poymol etilishiga yoʻl qoʻymaslikda davlat organlari bilan birga fuqarolik jamiyati institutlari ham faol ishtirok etmoqda. Biroq, ularni qoʻllab-quvvatlash doim ham yetarli emas.

Mamlakatingizda oʻtgan Osiyo forumida gender tenglikka erishish borasida ana shunday muammolarni xalqaro hamjamiyat eʼtiboriga havola etish imkoniyatiga ega boʻldik.

Samarqand ikki kun davomida Inson huquqlari boʻyicha Osiyo forumiga mezbonlik qildi. OʻzA muxbiri forum ishtirokchilari, taniqli ekspertlarning tadbir haqidagi fikrlari bilan qiziqdi.