"Faol tadbirkorlik, innovatsion g'oyalar va texnologiyalarni qo'llab-quvvatlash yili" Davlat dasturini amalga oshirish hamda BMTning bola huquqlari bo'yicha Konventsiyasini implementatsiya qilish doirasida bola huquqlarini himoya qilish sohasidagi qonunchilikni takomillashtirish masalalari" mavzusida davra suhbati bo'lib o'tdi.

O'zbekiston Respublikasi Oliy Majlisi Qonunchilik palatasida Inson huquqlari bo'yicha O'zbekiston Respublikasi Milliy markazi tomonidan O'zbekiston Respublikasi Oliy Majlisi Qonunchilik palatasining Demokratik institutlar, nodavlat tashkilotlar va fuqarolarning o'zini-o'zi boshqarish organlari va Fan, ta'lim, madaniyat va sport masalalari qo'mitalari bilan hamkorlikda tashkillashtirilgan "2017-2021 yillarda O'zbekiston Respublikasini rivojlantirishning beshta ustuvor yo'nalishi bo'yicha Harakatlar strategiyasi "Faol tadbirkorlik, innovatsion g'oyalar va texnologiyalarni qo'llab-quvvatlash yili" Davlat dasturini amalga oshirish hamda BMTning bola huquqlari bo'yicha Konventsiyasini implementatsiya qilish doirasida bola huquqlarini himoya qilish sohasidagi qonunchilikni
takomillashtirish masalalari" mavzusida davra suhbati bo'lib o'tdi.

Davra suhbati yig'ilishida deputatlar, manfaatdor vazirliklar, idoralar, huquqni muhofaza qiluvchi organlar, inson huquqlari bo'yicha milliy institutlar, ilmiy va ta'lim muassasalari, fuqarolik jamiyati institutlari vakillari, shuningdek YUNISEFning Yevropa va Markaziy Osiyo bo'yicha Mintaqaviy direktori Afshan Xan ishtirok etdilar.

Davra suhbatida O'zbekiston Respublikasi yosh, mustaqil, dinamik tarzda rivojlanayotgan davlat ekanligi ta'kidlanib, mamlakat Prezidenti SH.M.Mirziyoevning mamlakatimiz aholisining 30%ni yoki 10 millionini bolalar hamda yoshlar tashkil qilishi xaqidagi ma'lumotlariga to'xtalib o'tildi. Shuningdek, bolalar va yoshlarning jismoniy, intellektual hamda ma'naviy-ahloqiy rivojlanishini yuqori darajada ta'minlashga qaratilgan qonunchilik, dasturiy, tashkiliy, ijtimoiy-iqtisodiy va boshqa chora-tadbirlarni amalga oshirish davlat siyosatining ustuvor yo'nalishi ekanligi ham ta'kidlandi.

Davra suhbati ishtirokchilari O'zbekiston Respublikasining bolalar va yoshlarga nisbatan siyosatini amalga oshirishi Inson huquqlari umumjahon deklaratsiyasi, Bola huquqlari bo'yicha BMT konventsiyasi, inson huquq va erkinliklari bo'yicha boshqa xalqaro-huquqiy hujjatlar qoidalariga hamda bolalar va yoshlar huquqlariga rioya qilish, himoya qilishni ta'minlashning mustahkam huquqiy bazasini va tashkiliy-huquqiy asoslarini yaratgan O'zbekiston Respublikasi
Konstitutsiyasi, Kodekslar va “Bola huquqlari kafolatlari to'g'risida”gi, “Davlatning yoshlarga oid siyosati to'g'risida”gi qonunlari kabi 100 dan ortiq qonunlar va boshqa normativ-hujjatlarda o'z ifodasini topgan bolalikni himoya qilish milliy tajribasiga asoslanganligini qayd etib o'tdilar.

Ma'lumki, O'zbekiston Respublikasi BMTning Bola huquqlari bo'yicha Qo'mitasi va boshqa inson huquqlari masalalari bo'yicha shartnomaviy organlarining tavsiyalarini ijobiy qabul qiladi. Shuningdek, ularni amalga oshirish uchun 2014 yilda BMT Inson huquqlari bo'yicha Kengashi hamda shartnomaviy organlarining inson huquq va erkinliklari sohasidagi Milliy ma'ruzalarini ko'rib chiqish natijalari bo'yicha tavsiyalarini 2014-2016 yillarda bajarishga
qaratilgan Milliy harakat dasturi ham qabul qilindi.

O'zbekiston qonunchiligi hamda har yillik davlat dasturlari doirasida bolalar va yoshlarning ta'lim olishga, sog'liqni saqlashga, onalar va bolalar o'limini qisqartirishga, ularning ijtimoiy himoyasiga hamda dam olishga bo'lgan huquqlarini ta'minlash bo'yicha chora-tadbirlar amalga oshirilib kelinmoqda. Davlatning yoshlar siyosatini takomillashtirish, yosh avlodni har taraflama qo'llab-quvvatlash, bolalar va yoshlarni jismoniy tarbiya va sportga keng jalb etishga katta e'tibor qaratilmoqda. Tadbirda O'zbekiston Respublikasi Prezidenti SH.M.Mirziyoev 2017 yil 19 sentyabrdagi BMT Bosh Assambleyasining 72-Sessiyasidagi ma'ruzasida davlatlarning yoshlar huquqlarini himoya qilish sohasidagi siyosatini takomillashtirish hamda Yoshlar huquqlari bo'yicha Xalqaro konventsiya qabul qilishning muhimligini alohida ta'kidlab o'tganligi ham e'tirof etildi.

Yig'ilishda bolalar va yoshlar huquqlari bo'yicha Vakil institutini joriy qilish hamda “O'zbekiston Respublikasi Prezidenti huzuridagi bolalar va yoshlar huquqlari bo'yicha Vakil to'g'risida”gi Qonunni qabul qilish orqali yosh avlod huquqlarini himoya qilish milliy tizimini mustahkamlash zarur ekanligi ta'kidlandi.

Xalqaro va xorijiy tajribaga ko'ra bolalar, yoshlar huquqlari bo'yicha ixtisoslashtirilgan ombudsmanlar faoliyati, bolaning manfaati yo'lida davlat boshqaruvini takomillashtirishga, Bola huquqlari to'g'risidagi Konventsiya qoidalarini qonunchilik va huquqni qo'llash amaliyotiga tadbiq etishga, bolaning shaxsi, sha'ni hamda qadr-qimmati, huquqlari, erkinliklari va qonuniy manfaatlariga jamoatchilik, davlat tuzilmalari, shuningdek ota-onalar va ularning o'rnini bosuvchi shaxslarda hurmat darajasini oshirishga ko'maklashishi ta'kidlandi. Shu bilan birga tadbir ishtirokchilari yosh avlodning xavfsizligini ta'minlash tizimini shakllantirish maqsadida bolalar va yoshlar huquqlarini himoya qilish bo'yicha qo'shimcha tuzilmalar tuzish maqsadga muvofiq ekanligiga mustahkam ishonch bildirdilar. Bolalar va yoshlar bilan muloqot qilish, ularning so'rovlari va ehtiyojlarini qondirish, ularning muammolarini hal qilishda amaliy yordam ko'rsatish, ularning jismoniy va ma'naviy rivojlanishiga ko'maklashish – Shvetsiya hamda boshqa ko'plab davlatlar bolalar Ombudsmanining vazifasiga kirishini qayd etdilar.

Shuningdek, tadbirda "Faol tadbirkorlik, innovatsion g'oyalar va texnologiyalarni qo'llab-quvvatlash yili" Davlat dasturinining 172-bandini amalga oshirish bo'yicha ishlab chiqilgan "Ta'lim to'g'risidagi" Qonun loyihasining qoidalari ham muhokama qilindi. Qonun loyihasida ta'lim sohasida amalga oshirilayotgan tub islohotlar, nodavlat ta'lim muassasalari faoliyatini litsenziyalash masalalari, ta'lim tizimini bolalar va yoshlar huquqlari bo'yicha xalqaro standartlar va ilg'or xorijiy tajribaga asoslangan holda takomillashtirishga yo'naltirilgan ta'lim va va boshqa sohalarda davlat va xususiy hamkorlik tamoyillari o'z aksini topganligi borasida alohida ta'kidlandi.

Davra suhbati yig'ilishida muhokama qilingan qonun loyihalari va ularning xalqaro ekspertizasida UNICEFning ishtirokini yanada takomillashtirish bo'yicha tavsiyalar qabul qilindi.

Davra suhbati yig'ilishida deputatlar, manfaatdor vazirliklar, idoralar, huquqni muhofaza qiluvchi organlar, inson huquqlari bo'yicha milliy institutlar, ilmiy va ta'lim muassasalari, fuqarolik jamiyati institutlari vakillari, shuningdek YUNISEFning Yevropa va Markaziy Osiyo bo'yicha Mintaqaviy direktori Afshan Xan ishtirok etdilar.