Inson huquqlari sohasidagi ta’lim bo‘yicha Global forumning aynan qadimiy va navqiron Samarqand shahrida bo‘lib o‘tishi juda o‘rinli, mantiqli va teran ramziy ma’noga ega, – dedi Yevropa Kengashi Inson huquqlari va qonun ustuvorligi boshqarmasi bosh direktori Xristos Giyakumopulos. – Chunki ushbu zaminda necha asrlar davomida insoniyatga yaxshilik va manfaat keltiruvchi bilimlarga boy qanchadan-qancha noyob ilmiy asarlar yaratilgan.

Global forumni o‘tkazish uchun ham maqbul vaqt tanlangan. Zero, biz bugun Birlashgan Millatlar Tashkilotining Inson huquqlari sohasida ta’lim va tarbiya to‘g‘risidagi deklaratsiyasi natijalarini hamjihatlikda baholab turibmiz. Yaqin kunarda esa BMT Inson huquqlari umumjahon deklaratsiyasining 75 yilligiga bag‘ishlangan butunjahon kampaniyasi boshanadi. Mazkur Deklaratsiya qabul qilinganidan buyon o‘tgan davrda butun dunyoda inson huquqlari bo‘yicha qanchadan-qancha muhim mintaqaviy shartnomalar qabul qilinishiga turtki berib kelmoqda.

Shunday hujjatlardan biri – Inson huquqlari bo‘yicha Yevropa konvensiyasidir. Bugungi kunda ushbu Konvensiya Yevropa Kengashining qoq yuragida yashaydigan 700 million nafardan ortiq insonning huquqlarini himoya qiladi.

Yevropa Kengashi hukumatlararo tashkilot hisoblanadi. U o‘zida 46 ta a’zo-davlatni birlashtirgan bo‘lib, o‘zaro hamjihatlikda inson huquqlari, demokratiya va qonun ustuvorligi qadriyatlariga tayanib faoliyat olib boradi.

O‘tgan davrda Yevropa Kengashining 200 dan ziyod konvensiyasi qabul qilingan. Ularning uchdan ikki qismi Yevropa Kengashiga a’zo bo‘lmagan davlatlar ham imzolashi uchun ochiqdir. Shu tariqa mintaqaviy tashkilotimizning standartlari global standartlarga aylanmoqda. O‘z navbatida, ana shu global ahamiyatga ega standartlar turli huquqiy tizimlarni yaratish uchun qo‘l keladi.

Biz sudyalar, prokurorlar, advokatlar, yuristlar, davlat xizmatchilari, fuqarolik jamiyati vakillari inson huquqlarini ta’minlash borasida g‘oyat muhim manfaatdor tomonlardir, deb hisoblaymiz. Bu, o‘z navbatida, hozirgi raqamli va tez o‘zgarayotgan dunyoda ularni talab darajasida qo‘llab-quvvatlashni taqozo etadi.

Chunki inson huquqlari himoyasiga ixtisoslashgan mutaxassislar zarur vositalarga ega bo‘lishlari darkor. Ular bilimli, malakali va kundalik ish jarayonida inson huquqlari sohasidagi standartlarni amalda izchil qo‘llash ko‘nikmasi hamda imkoniyatariga ega bo‘lishlari shart.

Qisqasini aytganda, ana shunday jihatlardan olib qaraganda ham, Inson huquqlari sohasidagi ta’lim bo‘yicha Samarqand Global forumi ulkan ahamiyat kasb etadi. Fursatdan foydalanib, shunday dolzarb amaliy xalqaro muloqot uchun dunyoning turi hududlaridan o‘zaro hamfikr ko‘plab insonlarni bir joyga jamlagan tashkilotchilarga samimiy minnatdorik bildiraman.

G‘ulom MIRZO yozib oldi