27-28 sentyabr kunlari Inson huquqlari bo‘yicha O‘zbekiston Respublikasi Milliy markazi hamda O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi hamkorligida shu mavzuda o‘quv kursi o‘tkazildi. Mashg‘ulotlar davlat tashkilotlarida jamoatchilik bilan aloqalar va inson huquqlari sohasidagi xalqaro hamkorlik uchun mas’ul xodimlar hamda matbuot kotiblari uchun tashkil etildi.

O‘quv kursi O‘zbekiston Respublikasi Prezidentining 2023 yil 7 fevraldagi qarori bilan tasdiqlangan Inson huquqlari sohasidagi milliy ta’lim dasturi doirasida bo‘lib o‘tdi. Ushbu tadbir Inson huquqlari umumjahon deklaratsiyasi qabul qilinganining 75 yilligiga bag‘ishlandi.

Mashg‘ulotlar davomida asosiy e’tibor inson huquqlarini himoya qilish sohasidagi davlat siyosati hamda ushbu sohada xalqaro majburiyatlarning bajarilishiga doir axborotni keng jamoatchilik va xorijiy davlatlarning siyosatini shakllantiruvchi doiralariga yetkazish samaradorligi va sifatini oshirishga qaratildi.

Tadbirda O‘zbekiston Respublikasi Oliy Majlisi Qonunchilik palatasi Spikerining birinchi o‘rinbosari, Inson huquqlari bo‘yicha O‘zbekiston Respublikasi Milliy markazi direktori Akmal Saidov, O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi direktori Asadjon Xodjayev, O‘zbekiston Respublikasi Oliy Majlisi Qonunchilik palatasi Qo‘mita raisi Dilorom Fayziyeva, O‘zbekiston Respublikasi Oliy Majlisining Inson huquqlari bo‘yicha Vakili (ombudsman) Feruza Eshmatova hamda Inson huquqlari bo‘yicha milliy markaz xodimlari va ekspertlari, professor-o‘qituvchilar ishtirok etdi.

Tinglovchilar uchun “Inson huquqlari sohasida O‘zbekiston Respublikasining xalqaro majburiyatlari”, “Inson huquqlarini ta’minlashda Parlamentning roli”, “Inson huquqlarini ta’minlash va himoya qilishda ommaviy axborot vositalarining roli”, “Ayollar huquqlarini himoya qilishning huquqiy asoslari: xalqaro va milliy mexanizmlar”, “O‘zbekistonda bola hukuqlarini ta’minlash – davlat siyosatining muhim yo‘nalishi”, “Inson huquqlarini himoya qilishda Ombudsman instituti vazifalari”, “Inson huquqlari sohasidagi milliy ta’lim dasturining bajarilishi to‘g‘risida”, “O‘zbekistonda nogironlar huquqlarining ta’minlanishi masalalari” kabi mavzularda ma’ruzalar taqdim etildi. Shuningdek, interaktiv mashg‘ulotlar o‘tkazildi.

Ikki kunlik o‘quv kursida turli vazirlik, idora va tashkilotlar, shuningdek, Qoraqalpog‘iston Respublikasi, viloyatlar va Toshkent shahar hokimliklarining 79 nafar xodimi qatnashdi.

Inson huquqlari bo‘yicha

O‘zbekiston Respublikasi
Milliy markazining

matbuot xizmati