2022 yil 5-6 dekabr kunlari Samarqand shahrida «Inson huquqlari sohasida ta’lim» mavzusida Global forum bo‘lib o‘tadi.

Forumning Milliy tashkilotchisi – hukumatimiz nomidan Inson huquqlari bo‘yicha O‘zbekiston Respublikasi Milliy markazi hisoblanadi.

Mintaqamiz ijtimoiy-siyosiy hayotida ulkan voqea bo‘lishi kutilayotgan mazkur nufuzli xalqaro anjumanni o‘tkazish tashabbusi O‘zbekiston Respublikasi Prezidenti tomonidan Birlashgan Millatlar Tashkiloti Bosh Assambleyasining 76-sessiyasi va BMT Inson huquqlari bo‘yicha kengashining 46-sessiyasida ilgari surilgan.

Anjuman tashabbuskorlari orasida BMT Inson huquqlari bo‘yicha Oliy komissari Boshqarmasi, Oliy komissarning Markaziy Osiyo bo‘yicha mintaqaviy byurosi, BMTning mamlakatimizdagi jamoasi, Qochoqlar ishlari bo‘yicha oliy komissari boshqarmasi, YUNISEF, Yevropada xavfsizlik va hamkorlik tashkiloti Demokratik institutlar va inson huquqlari bo‘yicha byurosi, YeXHTning O‘zbekistondagi loyihalari muvofiqlashtiruvchisi ofisi, Yevropa Kengashi, Fridrix Ebert jamg‘armasi kabi yuqori nufuzli tuzilmalar bor.

Hamjihatlikda o‘tkazilayotgan форумdan ko‘zlangan asosiy maqsad BMTning Inson huquqlari sohasida ta’lim va tarbiya to‘g‘risidagi deklaratsiyasi hamda Inson huquqlari sohasidagi ta’lim bo‘yicha jahon ta’lim dasturi amalga oshirilishining oraliq natijasi sarhisobidan iborat.

Shuningdek, anjuman davomida ayni sohadagi ilg‘or tajriba va innovatsion yondashuvlar taqdimoti tashkil etiladi, ta’lim tizimini xalqaro, mintaqaviy va milliy darajada takomillashtirish bo‘yicha tavsiyalar ishlab chiqiladi.

BMT shafeligida gibrid formatda o‘tkaziladigan ushbu nufuzli forumda dunyoning turli davlatlaridan inson huquqlari sohasidagi ta’lim mutaxassislari, xorijiy ekspertlar, davlat idoralari, xalqaro va mintaqaviy tashkilotlar vakillari — jami 120 dan ortiq chet ellik mehmon ishtirok etishi kutilyapti.

Inson huquqi sohasidagi Jahon ta’lim dasturi – doimiy amalga oshiriladigan uzluksiz bosqichlardan iborat tashabbusdir. O‘tgan davr mobaynida mazkur dastur asosida inson huquqi sohasidagi ta’lim bo‘yicha milliy sa’y-harakatlar uch bosqichda bajarildi. Ayni payt 2024 yilga qadar davom etadigan to‘rtinchi bosqich izchillik bilan amalga oshirilmoqda.

Forumning ochilish marosimida O‘zbekiston Respublikasi Prezidenti Shavkat Mirziyoyevning murojaati o‘qib eshittirilishi, Birlashgan Millatlar Tashkiloti Bosh kotibi Antoniu Guterrish hamda BMT Inson huquqlari bo‘yicha Oliy komissari Folker Turkning videomurojaati namoyish etilishi kutilmoqda. Shuningdek BMT Inson huquqlari bo‘yicha kengashi raisi Elchi Federiko Vilegas, Yevropada xavfsizlik va hamkorlik tashkiloti Demokratik institutlar va inson huquqlari bo‘yicha byurosi direktori Matteo Mekachchi, Yevropa Kengashi Inson huquqlari va qonun ustuvorligi bo‘yicha direktorati Bosh direktori Yakumopulos Kristos ham qatnashadi.

Global forum yakunida Inson huquqlari sohasidagi ta’lim bo‘yicha yakuniy hujjat taqdimoti va qabul qilinishi ko‘zda tutilgan.

Saidmurod RAHIMOV, 

O‘zA