2018 yil 21 noyabr kuni Inson huquqlari bo'yicha O'zbekiston Respublikasi Milliy markazi, O'zbekiston Respublikasi Adliya vazirligi qoshidagi Yuristlar malakasini oshirish markazi va O'zbekiston Respublikasi Qonunchilik palatasining Demokratik institutlar, nodavlat tashkilotlar va fuqarolarning o'zini o'zi boshqarish organlari qo'mitasi bilan hamkorlikda tashkil etilgan “Inson huquqlarini himoya qilishning dolzarb masalalari” mavzusidagi xalqaro davra suhbati bo'lib o'tdi.

Davra suxbatida inson huquqlari bo'yicha xalqaro ekspertlar, xususan Reyn Myullerson (Estoniya), Marchin Valetski (YEXXT), Sima Samarlar (Afg'oniston) ishtirok etishdi.

Mazkur tadbirda O'zbekiston Respublikasi Prezidenti SH.Mirzieevning “Inson huquqlari Umumjahon deklaratsiyasi qabul qilinganligining 70 yilligiga bag'ishlangan tadbirlar dasturi to'g'risida”gi Farmonini  dolzarbligi va muximligi haqida aytib o'tildi.  Ushbu hujjatning qabul qilinishi inson huquqlari va erkinliklarining ishonchli himoyasini ta'minlashga qaratilgan tashkiliy-huquqiy va boshqa choralar tizimini yanada takomillashtirish, Inson huquqlari umumjahon deklaratsiyasining qadriyatlari va printsiplariga davlat, jamiyat va fuqarolarning e'tiborini oshirishdan iboratdir.

Davra suhbatida inson huquqlarini xalqaro darajada ta'minlashning dolzarb masalalari, hozirgi zamonda inson huquqlarini himoya qilish mexanizmlarining o'ziga hos hususiyatlari, O'zbekistonda inson huquqlari bo'yicha institutlarining rivojlanishi, inson huquqlarini himoya qilishda jamoat tashkilotlarining roli haqida muhokama qilindi.

Tadbirda Inson huquqlari bo'yicha O'zbekiston Respublikasi Milliy markazi xodimlari, Qonunchilik palatasi deputatlari, O'zbekiston Respublikasi Adliya vazirligi qoshidagi Yuristlar malakasini oshirish markazi professor-o'qituvchilari va tinglovchilari ishtirok etishdi.