O‘zbekiston Respublikasi Prezidenti Shavkat Mirziyoev tashabbusi bilan 2022 yil 5 dekabr kuni Samarqand shahrida o‘z ishini boshlagan “Inson huquqlari sohasidagi ta’lim” mavzusidagi Global forumning muhim yangiliklaridan biri – Global forum doirasida “Inson huquqlari sohasidagi ta’lim bo‘yicha mahorat darslari” bo‘ldi. U Global forumning ikkinchi kuni Samarqand davlat universitetida tashkil etildi.

“Mahorat darslari” Inson huquqlari bo‘yicha O‘zbekiston Respublikasi Milliy markazi tomonidan O‘zbekiston Respublikasi Oliy va o‘rta maxsus ta’lim vazirligi hamda BMTning Inson huquqlari bo‘yicha Oliy komissari Boshqarmasi bilan hamkorlikda o‘tkazildi.

O‘zbekiston Respublikasi Oliy Majlisi Qonunchilik palatasi Spikerining birinchi o‘rinbosari, Inson huquqlari bo‘yicha O‘zbekiston Respublikasi Milliy markazi direktori akademik Akmal Saidov va Oliy Majlis Senati a’zosi, Samarqand davlat universiteti rektori, O‘zbekiston Respublikasi fan arbobi Rustam Xolmurodov tadbirni ochib berdi. Onlayn shakldagi ushbu mahorat darslari yurtimizda ilk bor o‘tkazilayotganiga alohida e’tibor qaratildi.

Xalqaro anjuman ichidagi ma’rifiy anjumandan ko‘zlangan maqsad – O‘zbekiston oliy ta’lim muassasalari professor-o‘qituvchilari va talabalari uchun inson huquqlari fanidan saboq berish bo‘yicha namunaviy darslar tashkil etish ko‘nikmasini shakllantirishdir. Yurtimiz ta’lim muassasalari vakillarining inson huquqlari bo‘yicha bilim va ko‘nikmalarini rivojlantirish, ularni inson huquqlari sohasidagi dolzarb muammolar yechimlaridan ilmiy-ma’rifiy asosda xabardor qilish uchun inson huquqlari madaniyatini tarbiyalash yo‘nalishida o‘ziga xos ilg‘or saboqlar o‘tilishi muhim ahamiyat kasb etadi.

Mahorat darslari, zamon talablaridan kelib chiqib, ilg‘or xorijiy tajribalar asosida offlayn va onlayn usullarda olib borildi. Jahonning turli universitetlaridan taklif etilgan ko‘zga ko‘ringan professor-o‘qituvchilar ishtirokidagi qiziqarli ma’ruza va bahs-munozaralar, o‘z navbatida, jonli muloqot va amaliy savol-javoblar uchun qulay maydon yaratdi.

BMT Inson huquqlari bo‘yicha Oliy komissari Boshqarmasi Inson huquqlari bo‘yicha ta’lim va o‘qitish bo‘limi muvofiqlashtiruvchisi Yelena  Ippoliti, Tallin universiteti (Estoniya) tadqiqotchisi, Huquq xalqaro instituti a’zosi, professor Reyn Myullerson, BMT Qiynoqlarga qarshi qo‘mitasi a’zosi, professor Baxtiyor Tuzmuhamedov, BMTning Qiynoqlarga qarshi qo‘mitasi a’zosi, Amerika universiteti Vashington huquq kolleji professori Diego Rodriges-Pinson, Yevropa Kengashining Innovatsiyalar va rivojlanish bo‘limi rahbari Sergey Dikman, Yevropa Kengashi maslahatchisi Yeva Massa taqdim etgan ma’ruzalar keng qamrovli tinglovchilar auditoriyasini befarq qoldirmadi.

Ma’ruzachilar inson huquqlari sohasidagi ko‘p yillik tajribaga atroflicha to‘xtaldilar. Huquqni qo‘llash ko‘nikmalari, sohadagi kreativ va innovatsion yondashuvlar, xalqaro, mintaqaviy va milliy darajada inson huquqlari sohasida ta’lim bo‘yicha olib borilayotgan ibratli amaliyotga e’tibor qaratdilar.

Xususan, Inson huquqlari umumjahon deklaratsiyasi tamoyillari va qadriyatlarining inson, jamiyat va davlat manfaatlariga xizmat qilishi e’tirof etildi. Ta’lim sohasida inson huquqlari va erkinliklarini ishonchli himoya qilishni ta’minlash, shuningdek, qonunchilik va davlat organlarining amaliy faoliyatiga ayni sohadagi xalqaro standartlarni to‘liq implementatsiya qilish mexanizmlari hamda tartibi samaradorligini oshirish borasida atroflicha fikr almashildi.

Mahorat darslarida mamlakatimizning barcha hududlarida yuridik yo‘nalishda faoliyat olib boruvchi 20 dan ortiq oliy ta’lim hamda ilmiy-tadqiqot muassasalaridan 6500 dan ortiq professor-o‘qituvchi, prokuratura xodimlari, bakalavriat va magistratura yo‘nalishida tahsil olayotgan talabalar, ilmiy faoliyat bilan shug‘ullanayotgan yosh olimlar ishtirok etdi. Shuningdek, Adliya vazirligi tizimidagi 14 ta yuridik kollej o‘quvchilari ma’rifiy-huquqiy tadbirda faol qatnashdi. 

Inson huquqlari bo‘yicha
O‘zbekiston Respublikasi
Milliy markazining
matbuot xizmati

Mirzo Ulug’bek nomidagi O’zbekiston Milliy universiteti

Barqaror rivojlanish markazi

XS.UZ