Bu yil Inson huquqlari umumjahon deklaratsiyasining 70 yilligi butun dunyoda keng nishonlanadi. Shu ma'noda, O'zbekiston Prezidentining 2018 yil 5 maydagi Farmoni bilan “Inson huquqlari umumjahon deklaratsiyasi qabul qilinganining 70 yilligiga bag'ishlangan tadbirlar dasturi” tasdiqlangani muhim ahamiyatga ega bo'lib shu munosabati bilan 2018 yil, 26 sentabr kuni “Inson huquqlari Umumjahon Deklaratsiyasi va inson huquqlari sohasida yoshlar huquqi” mavzusida davra suhbati hamda “70 yil Inson huquqlari Umumjahon Deklaratsiyasi” kitobining taqdimoti bo'lib o'tdi.

Mazkur davra suhbatida O'zbekiston Respublikasi Oliy Majlisi Qonunchilik palatasi deputatlari, Inson huquqlari bo'yicha O'zbekiston Respublikasi Milliy markazi, O'zbekiston yoshlar ittifoqi markaziy kengashi, Adliya vazirligi va Respublika ta'lim markazi ma'sul xodimlari, Jahon iqtisodiyoti va diplomatiya universiteti, Toshkent davlat sharqshunoslik instituti va Toshkent davlat yuridik univesiteti talabalari ishtirok etdilar.

Tadbirni O'zbekiston Respublikasi Oliy Majlisi Qonunchilik palatasining Demokratik institutlar, nodavlat tashkilotlar va fuqarolarning o'zini o'zi boshqarish organlari ko'mitasi raisi, Inson huquqlari bo'yicha O'zbekiston Respublikasi Milliy markazi direktori A. Saidov hamda O'zbekiston Respublikasi Oliy Majlisi Qonunchilik palatasidagi Yoshlar masalalari bo'yicha Komissiyasi raisi, Qonunchilik palatasi depututi K. Tojiev kirish so'zi bilan ochib berdilar.

Tadbir davomida so'zga chiqgan O'zbekiston Respublikasi Oliy Majlisi Qonunchilik palatasidagi Yoshlar masalalari bo'yicha Komissiyasi raisi, Qonunchilik palatasi deputati I.Xodjiev “Inson huquqlari va erkinliklari kafolatining tamal toshi: yoxud Inson huquqlari umumjahon deklaratsiyasi tarixi va uning ahamiyati xususida”gi mavzusida ma'ruza qildilar.

Bulardan ko'zda tutilgan maqsad, avvalo, yoshlarning asosiy huquqlarini tushunishini yaxshilashga ko'maklashish, O'zbekiston Respublikasining Inson huquqlari umumjahon deklaratsiyasi qoidalarini milliy qonunchilikda mustahkamlash bo'yicha huquqiy yo'nalishdagi faoliyat haqida keng xabardorlikni yoshlarga yetkazib berishdan iboratdir.

Jonli muloqot va munozaralarga boy tarzda o'tgan ushbu  davra suhbati hamda taqdimot marosimida, professor Akmal Saidov Inson huquqlari Umumjahon Deklaratsiyasi bo'yicha quyidagi ma'lumotlarni ta'kidlab o'tdilar:

• Inson huquqlari umumjahon deklaratsiyasi – O'zbekiston mustaqillikka erishganidan so'ng qo'shilgan dastlabki xalqaro-huquqiy hujjatlardan biri ekanligi;
• Ushbu Deklaratsiyaning barcha asosiy tamoyillari O'zbekiston Respublikasi

Konstitutsiyasida o'z ifodasini topganligi;

• Deklaratsiya 1948 yilda qabul qilingandan keyin 500 tadan ko'proq tilga tarjima qilinib, jahonda eng ko'p tarjima qilingan hujjatga aylandi va ko'pgina yangi mustaqil davlatlar va yosh demokratiyalar konstituttsiyalari uchun namuna bo'lib xizmat qilib kelayotganligi.

Inson huquqlari umumjahon deklaratsiyasining 70 yilligi keng nishonlanishi munosabati bilan ushbu kitobning o'zbek (lotin va kiril), qoraqolpoq va rus tillarida chop etilganligi ishtirokchilarning qiziqishini uyg'otdi va mazkur kitob qatnashuvchilarga taqdim etildi.

26 sentabr kuni “Inson huquqlari Umumjahon Deklaratsiyasi va inson huquqlari sohasida yoshlar huquqi” mavzusida davra suhbati hamda “70 yil Inson huquqlari Umumjahon Deklaratsiyasi” kitobining taqdimoti bo'lib o'tdi.