8 iyul` kuni Inson huquqlari bo'yicha O'zbekiston Respublikasi Milliy markazi va Nagoya universitetining Osiyo huquqiy almashinuv markazi o'rtasida o'zaro ilmiy hamkorlik to'g'risidagi anglashuv Memorandumini imzolash marosimi bo'lib o'tdi. Tadbir Prezidentimizning Inson huquqlari bo'yicha O'zbekiston Respublikasi Milliy markazi faoliyatini takomillashtirish to'g'risidagi Qarori va Inson huquqlari bo'yicha O'zbekiston Respublikasi Milliy strategiyasi ijrosi doirasida tashkil etildi.

Ushbu Memorandumni imzolashdan ko'zlangan asosiy maqsad – inson huquqlarini himoya qilish sohasida xalqaro va mintaqaviy tuzilmalar, xorijiy mamlakatlarning inson huquqlari bo'yicha milliy institutlari bilan hamkorlikni rivojlantirishdan iborat. Bu o'rinda, xususan, Nagoya universitetining Osiyo huquqiy almashinuv markazi bilan inson huquqlarini himoya qilish va ularga rioya etilishini ta'minlash bo'yicha ilmiy hamkorlikni yanada mustahkamlash ko'zda tutilmoqda.

Tadbirda O'zbekiston Respublikasi Oliy Majlisi Qonunchilik palatasi Spikerining birinchi o'rinbosari, Inson huquqlari bo'yicha O'zbekiston Respublikasi Milliy markazi direktori Akmal Saidov, O'zbekiston Respublikasi Tashqi ishlar vaziri o'rinbosari G'ayrat Fozilov, Nagoya universitetining Osiyo huquqiy almashinuv markazi direktori Akira Fujimoto, Yaponiyaning O'zbekiston Respublikasidagi Favqulodda va muxtor elchisi Yoshinori Fujiyama ishtirok etdi.

Marosimda Nagoya universitetining dotsenti Aziz Ismatov moderatorlik qildi.

Memorandumni imzolash marosimida, shuningdek mamlakatimiz vazirlik va idoralari, oliy ta'lim muassasalari, xalqaro tashkilotlarning O'zbekistondagi vakolatxonalari vakillari qatnashdi.

Inson huquqlari bo'yicha O'zbekiston Respublikasi Milliy markazi direktori Akmal Saidov tadbir ochar ekan, O'zbekistonning inson huquqlari sohasidagi yangi tashabbuslari haqida muxtasar so'z yuritdi. Shuningdek, zamonaviy dunyoda inson huquqlarini himoya qilishning dolzarb masalalariga to'xtaldi.

Anglashuv memorandumi Inson huquqlari bo'yicha O'zbekiston Respublikasi Milliy markazi va Nagoya universitetining Osiyo huquqiy almashinuv markazi direktorlari tomonidan imzolandi.

Memorandumning asosiy yo'nalishlaridan biri – konstitutsiyaviy huquq, xalqaro huquq va inson huquqlari sohalarida tahliliy materiallar va adabiyotlar, qonun hujjatlari va axborot almashish, qo'shma dasturlarni amalga oshirish hamda seminarlar, treninglar tashkil etish nashrlarni targ'ib qilishdan iborat.

Muloqot asnosida ikki tomonlama hamkorlik doirasida inson huquqlarini himoya qilish va unga rioya etish masalalari bo'yicha muntazam ikki tomonlama maslahatlashuvlar o'tkazish rejalashtirilgani ta'kidlandi.

Tomonlar ushbu Memorandum doirasida va o'z davlatlarining milliy qonunchiligiga muvofiq inson huquqlari va erkinliklarini himoya qilish sohasida tenglik, o'zaro hurmat va manfaatdorlik asosida hamkorlik qilishga kelishib oldilar.

Ma'lumot uchun: Osiyo huquqiy almashinuv markazi (CALE) – 2000 yilda Osiyo davlatlari, jumladan, O'zbekistonda huquqiy tizimlarni rivojlantirish va takomillashtirishga bag'ishlangan tadqiqot va huquqiy yordam loyihalari bilan shug'ullanuvchi Nagoya universitetining Oliy huquq maktabi tarkibida tashkil etilgan. Markazning asosiy vakolatlari quyidagilardan iborat:

Osiyo mamlakatlari qonunlari va huquqiy yordam nazariyalari bo'yicha tadqiqotlarni muvofiqlashtirish;

Osiyodagi davlatlar tomonidan qonunlar ishlab chiqish va faoliyat ko'rsatishda zarur bo'lgan inson resurslarini rivojlantirish;

Osiyo haqida yaxshi bilmga ega va mintaqaning rivojlanishiga mazmunli hissa qo'sha oladigan global liderlar yoki mutaxassislarni qo'llab-quvvatlash.

Globallashuv talablari ayrim mamlakatlarning huquqiy tizimlarini xalqaro standartlarga muvofiqlashtirishni nazarda tutadi. Ushbu vazifalarni amalga oshirishda ko'maklashish uchun, Osiyo huquqiy almashinuv markazi milliy qonunchilik tizimlarini rivojlantirishga hissa qo'shgan holda, qonun loyihalarini ishlab chiqishda va boshqa tegishli tadbirlarda hamkorlik qiladi.

Inson huquqlari bo'yicha
O'zbekiston Respublikasi
Milliy markazining
matbuot xizmati